Lənkəranda müqəddəs Ramazan bayramı münasibətilə Milli Məclisin deputatı Hadi Rəcəbli 130 nəfər üçün iftar süfrəsi açıb. İftar süfrəsi ətrafına toplaşanlar dindarlar, yerlərdəki dini icmaların rəhbərləri, ağsaqqallar, şəhid ailələri, Qarabağ əlilləri və veteranları, I Avropa oyunlarında qələbə qazanan lənkəranlı idmançiların valideynləri və digər əhali quruplarının nümayəndələri olub.
Şeyxülislamın cənub bölgəsi üzrə səlahiyyətli nümayəndəsi Hacı Sədi Axundzadə orucluqdan və iftar süfrələrindən danışıb, qarşıdan gələn Ramazan bayramı münasibəti ilə iştirakçıları ürəkdən təbrik edib. Mərasimdə dini-mənəvi dəyərlər mövzusunda söhbətlər aparılıb, ölkə prezidenti İlham Əliyevin uğurları üçün dualar oxunub.
Milli Məclisin deputatı Hadi Rəcəbli iftar süfrəsində dövlət-din münasibətlərinin günbəgün güclənməsindən, son zamanlar həyata keçirilmiş mühüm və məqsədyönlü işlərdən danışıb.
Deputat daha sonra Lənkəranda İslam dəyərlərinə hörmət edən insanlar üçün yaradılan şəraitdən söz açıb. O da qeyd olunub ki, hər il prezident İlham Əliyevin özü də şeyxin iqamətgahında şəxsən iftar süfrəsində iştirak edir. Deputat qeyd edib ki, I Avropa oyunlarının ölkəmizdə keçilməsi Azərbaycanın dünyadakı böyük nüfuzunun göstəricisidir.
Eyni zamanda Lənkəran Şəhər İcra Hakimiyyəti başçısının müavini Möhübbət Babayev iftar süfrəsinə toplaşanları qarşıdakı Ramazan bayramı münasibətilə təbrik edib.
Dini icma numayəndələri, ağsaqqallar şurasının üzvləri, bələdiyyə sədrləri belə tədbirlərin keçirməsindən məmnun olduqlarını bildiriblər. Sonda Məhəmməd peyğəmbərin (s.a.s) həyatından bəhs edən film numayiş etdirilib.
Modern.az
