İyulun 11-də Çinin şərq sahillərini cənginə alan “Çan-xom” qasırğası nəticəsində ölkə iqtisadiyyatına dəyən birbaşa ziyan 1,9 milyard yuan (318 milyon dollar) miqdarında dəyərləndirilib. Modern.az-ın xarici KİV-ə istinadən verdiyi xəbərə görə, təbii fəlakətdən Çjetszyan əyalətinin Çjouşan şəhər dairəsinə daha çox zərər dəyib. Hidrometeroloqların məlumatına görə, burada küləyin sürəti saniyədə 45 metrə çatıb. Hazırda qasırğa yavaş-yavaş zəifləyir.
Yerli hakimiyyət 94 binanın tam, yaxud bir hissəsinin uçduğunu xəbər verib. 200 mindən çox insan işıqsız qalıb. Çjetszyan rayonundan 1 milyondan çox insan evaukasiya edilib. Bundan başqa, əyalətin hava ljmanları bağlanıb, 600-dən çox təyyarə reysi ləğv edilib. Dənizlə, eləcə də qatar və avtobuslarla uzaq ərazilərə sərnişin daşınması dayandırlıb. Təbii fəlakət nəticəsində insan itkisinin olub-olmadığı haqda hələ ki məlumat verilmir. “Çan-xom” qasırğası Çində bu həftə ikincidir. İyulun 9-da Çinin cənubunda “Lyanxua” qasırğasının baş verməsi nəticəsində 1,6 milyon insan zərər görmüşdü. Həmin təbii fəlakətin zərəri 1,3 milyard yuan (213 milyon dollar) dəyərləndirilib. Modern.az
