Müsavat deputat qrupundan olan millət vəkili, professor Nəsib Nəsibli ali təhsil müəssisələrinin, o cümlədən, universitetlərin paytaxtdan kənara köçürülməsinin tərəfdarıdır. Bununla bağlı fikirlərini sözügedən millət vəkili parlamentin Beynəlxalq münasibətlər və parlamentlərarası əlaqələr, Təhlükəsizlik və müdafiə, İnsan haqları, Hüquq siyasəti və dövlət quruculuğu komitələrinin 2011-ci ilin dövlət büdcəsinin müzakirəsinə həsr olunmuş birgə iclasında dilə gətirib.
Millət vəkilinin sözlərinə görə, universitetlərin paytaxtdan nisbətən kənara köçürülməsi və orada hər cür şəraitə malik olan böyük bir universitet şəhərciyinin salınması çox əhəmiyyətli olar: «Bu gün Azərbaycanın neft bumu yaşadığı bildirilir. Əgər biz indi neft bumunun yaşandığı bir vaxtda bu addımı atmayacağıqsa, bəs nə vaxt atacağıq? Elə bilirəm ki, bu məsələnin reallaşdırılmasının əsl vaxtıdır».
Müsavatçı deputat həmçinin, ali məktəb kitabxanalarının və elmi kitabxanaların təzə kitablar sarıdan ciddi problemlər yaşadığını iddia edib: «Bu gün nə ali məktəb kitabxanalarında, nə də elmi kitabxanalarda təzə kitablara rast gəlmək mümkündür. Bu sahədə ciddi problemlər yaşanmaqdadır. Hesab edirəm ki, bu məsələdə ciddi şəkildə öz həllini tapmalıdır». Birinci vitse-spiker Ziyafət Əsgərov isə millət vəkilinin fikirləri ilə razılaşmadığını bildirib və «siz axırıncı dəfə nə vaxt kitabxanada olmusunuz»- deyə sual edib.
«Görünür ki, siz son vaxtlar kitabxanalarda olmamısınız, olsaydınız, belə danışmazdınız. Bizim çox zəngin kitabxanalarımız var. Məsələn, Prezident Kitabxanasında, Axundov adına Kitabxanada çoxlu sayda təzə kitablar var. İstəsəniz, maraqlanıb tanış ola bilərsiniz» - deyə, birinci vitse-spiker fikirlərini tamamlayıb.
Modern.az
