Bitərəf millət vəkili, Azərbaycanın Avropa Şurası Parlament Assambleyasındakı (AŞPA) nümayəndə heyətinin üzvü, siyasi elmlər üzrə fəlsəfə doktoru Qənirə Paşayeva parlamentin Beynəlxalq münasibətlər və parlamentlərarası əlaqələr, Təhlükəsizlik və müdafiə, İnsan haqları, Hüquq siyasəti və dövlət quruculuğu komitələrinin 2011-ci ilin dövlət büdcəsinin müzakirəsinə həsr olunmuş birgə iclasında ali məktəb tələbələrinin yataqxana sarıdan ciddi problemlər yaşadığını dilə gətirib.
Onun sözlərinə görə, parlamentdə kənd rayonunu təmsil etdiyi üçün tez-tez bu yöndə problemlərlə üzləşən insanlar ona müraciətlər edir və o da öz növbəsində bu problemləri həll etməkdə çox zaman aciz qalmalı olur:
«Bildiyiniz kimi, bu gün universitetlərin əksəriyyətinin yataqxanasında qaçqın və köçkünlərimiz məskunlaşıb. Təbii ki, bunu başa düşmək olar, çünki onlar yurd-yuvalarını məcburən tərk etdiklərinə və yaşamağa yerləri olmadığına görə, bu yataqxanalarda yerləşiblər. Ancaq indi Azərbaycan o dövrdən fərqli olaraq xeyli inkişaf etmiş bir ölkədir. Yaxşı olardı ki, həmin yataqxanalarda məskunlaşan qaçqın-köçkünlərimiz üçün evlər tikilsin, onlar həmin evlərə köçürülsün, yaxud yeni yataqxanalar inşa edilsin. Məsələn, bu yaxınlarda deputat həmkarım, İqtisad Universitetinin rektoru Şəmsəddin müəllimə bir tələbənin yataqxanada yerləşdirilməsi ilə bağlı müraciət etmişdim. Ancaq nə qədər çalıdıq bu məsələ həll olunmadı, yataqxanada bir dənə olsun belə boş yer yox idi. Tələbələrimizin arasında imkansız ailələrin də övladlarının olduğunu nəzərə alaraq yataqxanalarla bağlı problemin yaxın zamanlarda öz həllini tapması vacibdir"..
Millət vəkili həmçinin, dövlət büdcəsində mədəniyyət sahəsinə ayırmaların artmasının vacib olduğunu vurğulayıb. Millət vəkilinin qeyd etdiyinə görə, Azərbaycan mədəniyyətinin təbliği istiqamətində çox işlər görülsə də, amma mədəniyyət sahəsinə ayrılan vəsaitin azlığı üzündən bu sahədə bir sıra problemlər də yaşanmaqdadır:
«Məsələn, xeyli sayda təmirə, bərpaya ehtiyacı olan mədəni-tarixi abidələrimiz var. Şəxsən mənim təmsil etdiyim bölgədə də bu cür mədəni-tarixi aibədələr mövcuddur və onların qısa zamanda təmirə ehtiyacları var. Bu mədəni-tarixi abidələr millətimizin yaddaşıdır, tariximizin bir hissəsidir. Ona görə hesab edirəm ki, onları uçulub - dağılmaqdan, məhv olmaqdan qurtarmaq üçün bu sahəyə ayrılan vəsaitlərin həcmini artırmaq lazımdır. Çox yaxşı olardı ki, növbəti ilin büdcəsində bu məsələyə bir daha yenidən baxılsın və ayrılan vəsaitlərin həcmi artırılsın».
Modern.az
