Müsavat deputat qrupundan olan millət vəkili, sabiq baş nazir Pənah Hüseyn sovetlər dövründən əmanət banklarında batan əmanətlərin gec də olsa, onların sahiblərinə qaytarılmasının tərəfdarıdır. Bununla bağlı fikirlərini sözügedən millət vəkili parlamentin Beynəlxalq münasibətlər və parlamentlərarası əlaqələr, Təhlükəsizlik və müdafiə, İnsan haqları, Hüquq siyasəti və dövlət quruculuğu komitələrinin 2011-ci ilin dövlət büdcəsinin müzakirəsinə həsr olunmuş birgə iclasında dilə gətirib. Millət vəkilinin sözlərinə görə, nəhayət, bu məsələ öz həllini tapmalıdır.
Modern.az xəbər verir ki, P.Hüseynin fikirləri onun deputat həmkarı, Yeni Azərbaycan Partiyasından (YAP) olan millət vəkili, Milli Məclisin (MM) İnsan hüquqları komitəsinin müavini Yevda Abramov tərəfindən də dəstəklənib:
«Bu gün Azərbaycan öz sosial-iqtisadi inkişafına görə, bölgənin lider ölkəsidir. Eyni zamanda, dünyada maliyyə və iqtisadi böhran davam etməsinə baxmayaraq, Azərbaycan bu problemdən az itki ilə çıxmağı bacaran, o cümlədən, sosial-iqtisadi inkişafına görə, dünyanın ən öncül ölkələrindən biridir. Ona görə, yaxşı olardı ki, əmanətlərin qaytarılması məsələsi öz həllini tapsın. Artıq əmanətlərin qaytarılacağı günü gözləyən insanların sıraları getdikcə azalmaqdadır. Onların çoxusu ya dünyasını dəyişib, ya da yaşlaşıblar. Odur ki, bu məsələnin həlli olduqca vacibdir».
Modern.az
