Bu gün Milli Məclisdə 2011-ci ilin dövlət büdcə layihəsinin müzakirəsi davam etdirilib. Modern.az-ın məlumatına görə, iclas hökumət nümayəndələrinin iştirakı ilə aparılıb.
İclasda deputatlar büdcə layihəsi ilə bağlı müxtəlif təkliflərlə çıxış ediblər.
Müzakirələrdən sonra iqtisadi inkişaf naziri Şahin Mustafayev, maliyyə naziri Samir Şərifov səslənən təkliflərə münüsibət bildirərək onların nəzərə alınacağına söz veriblər.
Modern.az-ın əməkdaşı parlamentdən xəbər verir ki, Milli Məclis büdcə layihəsinin müzakirələrini başa çatdırıb.
Daha sonra büdcə zərfinə daxil olan “Azərbaycan Respublikası Dövlət Sosoial Müdafiə Fondunun 2011-ci il büdcəsi haqqında” qanun müzakirəyə çıxarılıb. Bunun ardınca deputatlar büdcə zərfinə daxil olan “Azərbaycan Respublikasında 2011-ci il üçün yaşayış minimumu haqqında”, “Azərbaycan Respublikasında 2011-ci il üçün ehtiyac meyarının həddi haqqında” və digər qanun layihələrinə rəy bildirməlidirlər.
Qeyd edək ki, 2011-ci ilin dövlət büdcəsi layihəsi Milli Məclisin verdiyi rəylə Nazirlər Kabinetinə göndəriləcək. Hökumət 10 gün müddətində layihəyə baxmalı, Milli Məclisdən daxil olan təklifləri nəzərə almalı və onun qəbul edilməsi üçün yenidən parlamentə qaytarmalıdır.
Büdcə layihəsində 2011-ci ilin dövlət büdcəsinin gəlirlərini 12 061 000,0 min manat, xərclərini 12 748 000,0 min manat (o cümlədən, mərkəzləşdirilmiş gəlirləri 11 613 958,2 min manat, yerli gəlirləri 447 041,8 min manat və mərkəzləşdirilmiş xərcləri 11 440 460,0 min manat, yerli xərcləri 1 307 540,0 min manat) məbləğində təsdiq etmək nəzərdə tutulur.
Dövlət büdcəsində fiziki şəxslərin gəlir vergisi 690 000,0, hüquqi şəxslərin mənfəət (gəlir) vergisi 210 000,0, əlavə dəyər vergisi 2 121 600,0, Azərbaycan Respublikasının ərazisinə malların idxalına görə əlavə dəyər vergisi 818 000,0, aksiz vergisi 495 000,0 min manat həcmində göstərilib.
Xərclərin istiqamətlərinə gəlincə, ümumi dövlət xidmətləri xərcləri 1.140.095.734,0, elm xərcləri 108.720.757,0, müdafiə xərcləri 1.325.061.150,0 manat nəzərdə tutulur.
Təhsilə 1.338.163.082,0, səhiyyəyə 545.372.870,0, sosial müdafiə və sosial təminata 1.324.085.745,0 manat ayırmaq planlaşdırılır.
Modern.az
