Ukrayna Ali Radası önündə bir neçə saat öncə başlayan toqquşmalarda azı 2 hüquq-mühafizə orqanı əməkdaşı həlak olub. Modern.az Ukrayna KİV-nə istinadən xəbər verir ki, Ukraynanın mərkəzi hakimiyyəti zəiflədərək ölkənin şərqindəki bəzi bölgələrə geniş muxtariyyət hüququnun verilməsinə etiraz edən aksiya iştirakçıları polislə toqquşmaya gediblər. Kütlənin içindən polis və Milli Qvradiya mövqelərinə doğru atılan döyüş qumbarasının partlaması nəticəsində son məlumatlara görə, azı 2 asayiş keşikçisi həlak olub, 30-a qədər insan isə yaralanıb. Yaralananlar arasında jurnalistlərin də olduğu bildirilir.
