Yeni dərs ilinin başlamasına 2 həftədən də az qalıb. İstər müəllimlər, istərsə də şagirdlər böyük bir intizarla məktəblərin açılmasını gözləyirlər. Bu il ilk dəfə məktəbə gedəcək uşaqlar isə həyəcan və intizardadırlar.
Modern. az orta məktəblərdə təhlükəsizliyin hansı səviyyədə təmin edilməsi ilə bağlı təhsil üzrə ekspert Etibar Əliyevin fikirlərini öyrənib. Onun fikrincə, orta məktəblərdə mühafizə sistemi çox zəifdir: “Biz tez-tez görürük ki, mühafizəçilərin çoxu heç yerində oturmur. Bu, bilavasitə iki səbəblə bağlıdır. Birincisi, əmək haqqı azdır, digər tərəfdən işin təşkili çox zəif qurulub.
Məlumdur ki, özəl məktəblərdə, liseylərdə mühafizəçilər həmin məktəbin gəliri hesabına saxlanılır. Lakin dövlət orta məktəblərində belə deyil. Əslində vahid şəbəkə şəklində fəaliyyət göstərilməlidir. Yalnız özəl məktəblər qorunma statusuna malik olmamalıdır.
Bütün məktəblərə şamil olunmalıdır. Orada bizim uşaqlarımız təhsil alırlar, təhlükəsizlikləri təmin olunmalıdır. Fikrimcə, bu problemin həlli üçün yeni vəsaitlər ayrılmalıdır. Mühafizə xidməti vahid formada həyata keçirilməlidir”.
Etibar Əliyev onu da vurğuladı ki, ümumtəhsil orta məktəblərində direktorlar mühafizə sisteminə ciddi nəzarəti boyunlarına götürməlidirlər: “Məktəb direktorları nəzarət etməlidirlər.
Açıq danışaq, məktəb direktorları istər müəllimlərdən, istərsə də şagirdlərdən qanundan kənar əlavə vəsaitlər istəyə bilirsə, o zaman həmən vəsaitin heç olmasa bir hissəsini də mühafizəyə ayırmalıdır. Yaxud hər bir məktəbin fondu yaradılıb. Həmin fondun hesabına mühafizəçilərin sayı artırılmalıdır, gücləndirilmiş şəraitdə nəzarət altına alınmalıdır. Lakin etiraf edək ki, bu gün buna əməl olunmur və məktəblərin qorunması qənaətbəxş deyil”.
O, Təhsil Nazirliyinin də məsələ ilə əlaqədar birbaşa müdaxiləsinin və tez-tez monitorinqlərin keçirilməsinin vacibliyini vurğulayıb: “Təhsil Nazirliyi mühafizə xidməti ilə məşğul olan şirkətlərlə birbaşa müştərək formada hərəkət etməlidir.
Ümumtəhsil orta məktəblərində bütün proseslərə nəzarəti Təhsil Nazirliyi edir. Ona görə nazirlik həmin mühafizə şirkətləri ilə əlaqə saxlamalı, mühafizənin ciddi, yaxud qeyri-ciddiliyinə nəzarət etməlidir, çatışmazlıqlar varsa aradan qaldırmaq üçün müəyyən tədbirlər görməlidir. Bundan əlavə, məsələlərdə tez-tez monitorinqlər aparmaq lazımdır”.
Leyla Əfqan
