Çeçen Respublikasının prezidenti Ramzan Kadırov sosial şəbəkələrdə onun adından yaradılan saxta profillərdən şikayət edib və onların bağlanılmasını istəyir.
Modern.az Rusiya mətbuatına istinadən xəbər verir ki, Kadırov özünün İnstagram-dakı profilndə digər sosial şəbəkələrdəki real akkauntlarının ünvanlarını dərc edib.
Prezident bildirib ki, bundan çoxdan xəbəri var: “Belə məsələlərə sakit yanaşırdım. Amma qəribəsi odur ki, bəzi mətbu orqanları bu səhifələrin mənim olmadığımı bildikləri halda, ora istinadən hansısa sitatları, hadisələri yazırlar”.
Hazırda Kadırovun İnstagram-ında milyondan artıq izləyicisi var. İki il yarım ərzində Çeçen prezidenti 5 mindən artıq şəkil və şərh paylaşıb. Fotobloqunda Kadırov respublika daxilindəki hadisələrdən, qəbul etdiyi qərarlardan söz açır.
2014-cü ildə Ramzan Kadırovun İnstagram-ı Rusiya KİV-lərində ən çox istinad olunan bloq olmuşdu.
