Azərbaycan Milli Məclisinin Sosial siyasət komitəsinin sədr müavini, tibb üzrə fəlsəfə doktoru Musa Quliyev bu günlərdə Beynəlxalq Mükafat Birliyinin İctimai Təltif Şurası tərəfindən 1-ci dərəcəli “Hippokrat ordeni” ilə təltif olunub.
Modern.az saytı xəbər verir ki, deputat bu beynəlxalq mükafatla sosial müdafiə və səhiyyə qanunvericiliyi sahəsində dünya standartları səviyyəsində təkmil olan qanunların və digər qanunverici sənədlərin hazırlanması və qəbulu sahəsindəki fəaliyyətinə, eləcə də beynəlxalq əməkdaşlığa verdiyi töfhələrə görə təltif edilib.
Musa Quliyevin hazırladığı və onun təqdimatı ilə qəbul olunmuş iki qanun (“Körpələrin və azyaşlı uşaqların qidalanması haqqında” (2001) və “İnsanın immunçatışmazlığı virusunun törətdiyi xəstəliklə mübarizə haqqında” (2014) qanunlar) BMT-nin Uşaq Fondu (UNİSEF) və Ümumdünya Səhiyyə Təşkilatı tərəfindən üzv ölkələr üçün model qanun kimi tövsiyyə olunub.
Qeyd edək ki, Musa Quliyev tibb elmi və səhiyyənin müxtəlif sahələrində dünya insanlığı üçün xüsusi xidmətləri olan görkəmli şəxslərin təltif olunduğu bu ali mükafata layiq görülən ilk azərbaycanlı millət vəkilidir.
Baş Ofisi Cenevrə şəhərində yerləşən Beynəlxalq Mükafat Birliyinin Ordeni həmyerlimizə təşkilatın Moskva Bürosu tərəfindən təqdim edilib.
Modern.az
