Nəqliyyat naziri Ziya Məmmədovun bacısı, "Tərəqqi" liseyinin direktoru Məhbubə Məmmədovanın tutduğu vəzifədən azad edildiyi barədə xəbər yayılıb.
Modern.az-ın məlumatına görə, xəbəri yayan İstiqlal.az bunu nəqliyyat nazirinin "vurulması" ilə bağlayıb.
Bundan əvvəl isə Ziya Məmmədovun səlahiyyətlərinin əhəmiyyətli hissəsi əlindən alınıb. "Azərbaycan Dəmir Yolları" QSC Nəqliyyat Nazirliyinin tabeliyindən çıxarılıb, taksilərə lisenziya verilməsi ASAN xidmətə tapşırılıb, yaxın vaxtlarda "Azəryolservis"lə də bağlı analoji addım atılacağı qeyd olunur.
***
AzNews.az-ın əməkdaşı məlumatı dəqiqləşdirmək üçün “Tərəqqi” liseyi ilə əlaqə saxlayıb.
Liseydən bildirilib ki, Məhbubə Məmmədovanın işdən çıxarılması haqda yayılan məlumatlar yalandır: “Dünən Məhbubə xanım iş başında olub. Sonra da Təhsil Nazirliyinin təşkil etdiyi böyük toplantıya qatılıb və orada çıxış edib”.
Liseydən həmçinin bildirilib ki, Məhbubə xanımın işi ilə bağlı heç vaxt narazılıq olmayıb: “O, 50 ildir müəllim kimi çalışır. Öz işinin peşəkarıdır. Buna görə də bizim liseyimiz hər il Təhsil Nazirliyinin yaydığı hesabatlarda ön sıralarda olub. Bu il də nazirliyin tərtib etdiyi siyahıda “Tərəqqi” liseyi ilk 10-luqda qərar tutub.
Bundan başqa Məhbubə xanım rayonda ictimai işlərdə də fəal iştirak edən şəxsdir. O hakim partiyanın əsas təbliğatçılarından biri hesab olunur. Belə ki, Məhbubə xanım YAP-ın Nərimanov rayon təşkilatının qadınlar şurasının sədr müavini kimi də bu işlərdə fəal iştirak edir. Eyni zamanda Məhbubə xanım 15 ildir ki, məntəqə sədridir. Yəni haqda yayılan məlumatların heç bi əsası yoxdur, iftiradan başqa bi şey deyildir”.
Liseydən o da bildirilib ki, dünən Prezident İlham Əliyevin sərəncamı ilə təltif olunan müəllimlər sırasında "Tərəqqi"nin də 2 müəllimi var. Həmin müəllimlər məhz M.Məmmədovun təqdimatıyla təltif edilib.
Modern.az
