Belarus müxalifətinin liderləri Nikolay Statkeviç, Vladiumir Neklyaev və Anatoli Lebedko beynəlxalq ictimaiyyəti oktyabrın 11-də keçirilən prezident seçkilərinin nəticələrini tanımamağa çağırıb. Modern.az xarici mediaya istinadən bildirir ki, onlar bu çağırışı birgə keçirdikləri mətbuat konfransında ediblər.
“Belarus Respublikasında prezident seçkiləri” adlandırılan siyasi kampaniya başa çatıb”, - Neklyaev bəyan edib. Onun sözlərinə görə, bu kampaniya əvvəlcədən gözlənildiyi kimi yekunlaşıb: “Bəyan edilirdi ki, indiki prezident 82 faiz səs toplayacaq və bu gercəkləşir”.
Neklyaevin sözlərinə görə, müxalifət liderləri yığışıblar ki, bunu bəyan etsinlər: “Belarus rejiminin oynadığı seçki tamaşasını seçki hesab etmirik və bu seçkiləri tanımırıq”.
Onun fikrincə, bunu seçkidən başqa nə desən adlandırmaq olar: “Bu xalqı lağa qoymaqdır”.
Modern.az
