Azərbaycanın Dövlət Mülki Aviasiya Administrasiyası və Macarıstan-Polşa büdcə aviaşirkəti "WizzAir" Budapeşt-Bakı-Budapeşt marşrutu üzrə mütəmadi reyslərin bərpa edilməsi barədə razılığa gəliblər.
Modern.az xəbər verir ki, bu məqsədlə "WizzAir" və "Ground Handling Company" arasında reyslərə xidmət göstərilməsinə dair saziş imzalanıb. Sazişi Azərbaycan tərəfindən "Ground Handling Company"nin rəhbəri İlqar Ələkəbərov, "WizzAir" tərəfindən isə aviaşirkətin baş direktoru Yojef Varadi imzalayıb.Saziş əsasında "WizzAir" 2016-cı ilin martından Budapeşt-Bakı-Budapeşt marşrutu üzrə mütəmadi reyslərin həyata keçirilməsinə başlayacaq.
Aviaşirkət əvvəlcə reysləri həftədə bir dəfə reallaşdıracaq, yayda isə onların tezliyini həftədə ikiyədək artıracaq. Əldə edilmiş razılığa əsasən, "WizzAir" bütün il ərzində Budapeşt-Bakı-Budapeşt mütəmadi reyslərini həyata keçirməyi üzərinə götürür.
Qeyd edək ki, sazişdə Budapeşt-Bakı-Budapeşt reyslərinə xidmət üzrə ediş üçün biletlərin qiyməti 39,99 avro nəzərdə tutulub.
Modern.az
