“Azərbaycanda hər yüz min nəfərdən 50-ə yaxını ağciyər xərçəngindən əziyyət çəkir”
Milli Məclisin deputatı, Milli Elmlər Akademiyasının katibi, Tibb Universitetinin rektoru Əhliman Əmiraslanov Modern.az-a açıqlamasında “Reproduktiv sağlamlıq haqqında” Qanun layihəsinə münasibət bildirib: “Bu sənədin müzakirəsində iştirak etməmişəm. Ancaq hesab edirəm ki, bu, çox vacib sənəddir. Cox insanlar o qanunun qəbulunu gözləyir. Bu barədə çox danışmaq olar. Bilirsiniz, bununla nə qədər insanların taleyi həll olunur..? Mən hesab edirəm ki, bu qanun qəbul olunmalıdır və əminəm ki, yaxın vaxtlarda bu qanun qəbul olunacaq. Məsələ ilə bağlı öz təkliflərim də var”.
Onkologiya üzrə dünya şöhrətli mütəxəssis deyib ki, indi dünyada onkoloji xəstəliklər ən çox tələfat verən xəstəliklərdən sayılır: “İnsanlar arasında ən çox ölümə səbəb olan xəstəlik ürək-damar patalogiyasıdır, ikinci yerdə isə onkoloji xəstəliklər dayanır. Dünyada bu xəstəliklərin sayı durmadan artır. O cümlədən bizdə də bu xəstəliklər ilbəil artır. Onkoloji xəstələrin ölüm göstəricisi artıq stabilləşməkdədir. Ümumiyyətlə, ən çox təsadüf olunan ağciyər xərçəngidir. Azərbaycanda hər yüz min adamdan 50-ə yaxın insan bu xəstəliklərdən əziyyət çəkir. Bütövlükdə, dünyada bu göstərici 60-a yaxındır. Ancaq buna qarşı ciddi tədbirlər görülməlidir. İlk növbədə dövlət səviyyəsində xəstəliklərə qarşı mübarizə proqramı hazırlanmalıdır. Bu tək həkimlərin işi deyil, bu kompleks şəkildə həyata keçməlidir. Burda qidalanma faktoru, ətraf mühütün mühafizəsi ciddi faktordur. Bunlara qarşı mübarizə planı hazırlanmalıdır. Bu gün respublikamızda bu xəstəliklərin müalicəsi üçün tam şərait var. Bununla bağlı Onkoloji Elm Mərkəzi fəaliyyət göstərir. Tibb Universitetinin Onkoloji klinikası tam standartlara cavab verən texniki ləvazimatlarla təchiz edilib”.
Ə.Əmiraslanov qeyd edib ki, bu gün Azərbaycanda belə xəstəlik daşıyıcılarının başqa ölkələrə getməsinə heç ehtiyac yoxdur: “İnsanların xaricə üz tutmasının səbəbinə gəlincə, deyə bilərəm ki, bu, təkcə bizim problem deyil. İnsanlar həmişə peyğəmbəri kənarda axtarırlar. Bizdə imkanlı insanlar gedib xaricdə müalicə olunurlar. Ona görə bu problem var. Ancaq bu o demək deyil ki, onlar gedirlər xaricdə müalicə olunurlar, Azərbaycanda bu, mümkün deyil. Bu, əsla belə deyil. Mən tam səmimi sizə deyirəm, Azərbaycanda müalicəsi olmayan bir xəstəlik belə yoxdur”.
Əməliyyatların qiymətləri məsələsinə toxunan rektor bildirib ki, bununla bağlı bir şey deyə bilməz: “Mən bu işlə məşğul olmuram. İndi bəzən deyirlər bizim həkimlər səhv edirlər. Onu deyə bilərəm ki, xarici həkimlər tərəfindən müalicə olunan xeyli xəstəni yenidən mən şəxsən özüm müalicə etmişəm. Kimin pulu var gedir xaricə, getsin, biz bunların əllərini tuta bilmərik. Məndən soruşanda ki, filan orqanımda şiş var, xarici ölkəyə getmək istəyirəm, mən heç vaxt buna etiraz etmərəm. İnsanlar harda istəyirlər, müalicə olunsunlar”.
Akademik Azərbaycanda satılan dərman pereparatlarının keyfiyyət məsələsindən də danışıb: “Bilirsiniz, indi dərmanların keyfiyyəti ilə bağlı sizə heç nə deyə bilmərəm. Aydın məsələdir ki, keyfiyyətsiz dərmanın xəstəyə heç bir faydası olmayacaq. Bununla bağlı müxtəlif tədbirlər görülür. Bütölükdə mən deyə bilmərəm ki, həkimlərimizlə bağlı da problemlər yoxdur. Ancaq indi Azərbaycanda çox yaxşı həkimlər, mütəxəssislər var. Bununla belə səriştəsiz həkimlər də az deyil. Bəzən mətbuatda yazılır ki, Azərbaycanda savadlı həkim çatışmır. Hesab edirəm ki, bu həqiqətə uyğun deyil, nadanlıqdır.
Mən sizə deyim ki, əvvəllər bizdə ciddi kadr problemi var idi. Ən yeni avadanlıqlar Azərbaycana gətiriləndə onlardan istifadə edə biləcək mütəxəsisslər az idi. Ancaq indi bu məsələlər tamam həll olunub. Bizim Tibb Uinversitetinin məzunları Almaniyada, Türkiyədə çox böyük müvəffəqiyyətlə çalışırlar. Deyə bilərəm ki, bu dəqiqə Türkiyədə 150-yə yaxın məzunumuz çalışır. Təkcə Səudiyyə Ərəbistanda ATU-nun 300 azərbaycanlı vətəndaşı həkim işləyir. Ümumilikdə, ATU-dan 25 mindən çox həkim dünyanın müxtəlif ölkələrində fəaliyyət göstərir”.
Modern.az
