Türkiyənin İzmir şəhərində səfərdə olan İşğala, Terrora və Əsassız İddialara qarşı Beynəlxalq Forumun təsisçiləri olan Azərbaycanın QHT rəhbərləri İzmir şəhərinin Boronovo və Karabağlar bələdiyyə rəhbərləri Olğun Atilla və Muhittin Sevitopu tərəfindən qəbul olunublar.
QHT nümayəndələri İzmir şəhəri Karabağlar bələdiyyəsi ərazisində salınacaq Xocalı soyqırımına həsr olunan parkın hazırlıq işləri ilə tanış olublar.
Daha sonra İsmət İnönu adına Kültür mərkəzində Beynəlxalq Forumun ictimaiyyət üçün təqdimatı keçirilib. Tədbirdə Azərbaycan QHT-ləri Dağlıq Qarabağ münaqişəsi ilə bağlı həqiqətlərin dünyaya çatdırılması, qondarma “erməni soyqırımı” iddialarının ifşa edilməsi, terror və digər regionların ümumu problemləri haqqında geniş informasiya verilib.
Günün sonunda Forumun iştirakçılarına Azərbaycan QHT rəhbərlərinə ziyafət verilib. Azərbaycan QHT rəhbərləri Beynəlxalq Forumun İzmir şəhərində yüksək səviyyədə təşkil olunmasına görə Boronovo bələdiyyə başqanı Olğun Atilla və Karabağlar bələdiyyə başqanı Muhittin Sevitopuya təşəkkür edib və Azərbaycan ilə bağlı xatirə hədiyyələri təqdim ediliblər.
