Dördüncü çağırış parlamentin Sosial siyasət komitəsinin delabrın 13-də keçirilən ilk iclasında Milli Məclisin (MM) 2011-ci ilin yaz sessiyası zamanı müzakirəsi nəzərdə tutulmuş təxmini qanun layihələri ətrafında fikir mübadiləsi aparılıb.
Komitə sədri Hadi Rəcəblinin bildirdiyinə görə, yaz sessiyasının müzakirəsinə təqdim edilməsi nəzərdə tutulmuş təxminən 18-ə yaxınq anun layihəsi var. O, qeyd edib ki, həmin qanun layihələrindən biri «Reproduktiv sağlamlıq və ailə planlaşdırması haqqında» qanun layihəsidir: «Bildiyiniz kimi, biz bu qanun layihəsini ötən çağırışda birinci oxunuşun müzakirəsinə çıxarmışdıq. Lakin orada əksini tapan bəzi məqamlar - «surroqat ana» və «donor bank» məsələsi ciddi mübahisələrə səbəb olmuşdu. Çoxları bu məsələlərin milli mentalitetimizə uyğun gəlmədiyini iddia edirdilər. Hansı ki, qonşu İran İslam Respublikasında neçə illərdir bundan istifadə olunur. Düzünü desəm, o vaxt qanun layihəsini təqdim edərkən bizim komitə də lazımi fəallıq göstərmədi. Ona görə sənəd geri qaytarıldı. Biz bu qanun layihəsini komitəmizin yeni üzvlərinə də təqdim etmişik. Vaxt var, yaxşı olar ki, onlar da həmin qanun layihəsini tələsmədən oxusunlar, öz mövqelərini bildirsinlər və nəhayət, bu qanun layihəsini təkmilləşdirilmiş formada yenidən parlamentin müzakirəsinə çıxaraq».
Yaz sessiyasının müzakirəsinə çıxarılması gözlənilən qanun layihələri arasında «Pasientlərin hüquqları», «Sosial işçilər haqqında» qanun layihələrinin də olduğunu bildirən komitə sədri sonuncu qanunvericilik aktı haqqında geniş danışaraq deyib ki, artıq neçə müddətdir Azərbaycanda sosial işçi institutu yaradılıb, ancaq bununla belə bu yöndə ayrıca qanunvericilik bazası formalaşdırılmayıb. «Odur ki, biz bu yöndə də qanun layihəsinin hazırlanmasını, müzakirələrə çıxarılmasını və qəbul olunmasını vacib sayırıq» - deyə, komitə sədri sözlərinə əlavə edib. H.Rəcəbli həmçinin, «İşəgötürən birlikləri haqqında» qanun layihəsinin də qəbulunun vacib olduğunu söyləyib: «Bildiyiniz kimi, Azərbaycanda həmkarlar ittifaqları ilə bağlı ayrıca qanun var, ancaq işəgötürən birlikləri haqqında qanun hələ də yoxdur. Bu heç cür düzgün deyil. Ona görə hesab edirəm ki, nəhayət, neçə müddətdən bəri gündəliyimizdə olan «İşəgötürən birlikləri haqqında» qanun layihəsinin də müzakirələr çıxarılması, qəbulu qaçılmazdır». Bununla belə komitə sədri Ailə, Əmək Məcəllələrinə dəyişikliklərə də ehtiyac olduğunu, uzun müddətdən bəri bu yöndə də müzakirələrin getdiyini xatırladıb: «Hesab edirəm ki, bu məcəllələrə də dəyişiklik etməyin zamanı çatıb. Çox güman ki, qarşıdan gələn yaz sessiyasında biz bu məcəllələrə gözlənilən dəyişikliklərlə bağlı qanun layihələrini müzakirələrə çıxara və onun qəbuluna nail ola biləcəyik».
Komitə sədri bununla belə, «Mərasimlər haqqında» qanun layihəsinin qəbulu məsələsinə toxunaraq bildirib ki, hazırda bununla bağlı üç istiqamət var. Və bu istiqamətlərdən biri kimi «Dəfn mərasimləri və qəbiristanlıqlar haqqında» qanun layihəsinin müzakirələrə çıxarılması mümkün ola bilər: «Bu çoxlarına bir qədər qəribə gələ bilər, deyə bilərlər ki, Hadi müəllimin işi-gücü qurtarıb, indi də bununla məşğul olur. Amma neyləmək olar, bu məsələnin də tənzimlənməsi lazımdır».
Modern.az
