“Azərbaycan Xəzər Dəniz Gəmiçiliyi” QSC-nin tərkibində daxil olan "Zığ” Gəmi Təmiri və Tikintisi Zavodunun direktoru Rəfail Mikayılov məhkəməyə müraciət edib.
Modern.az-ın məlumatına görə, direktor barəsində Azərbaycan Respublikasının Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən İnzibati Xətalar Məcəlləsinin 555.3-cü (Bədbəxt hadisənin baş vermə faktının işəgötürən tərəfindən gizlədilməsinə və ya aparılan araşdırılma barədə müvafiq akt tərtib etməkdən boyun qaçırılmasına görə) maddəsi ilə inzibati protokol tərtib edilib.
Rəfail Mikayılov bundan sonra həmin qərardan Xətai rayon məhkəməsinə müraciət edib.
İşə hakim Fuad Axundovun sədrliyi ilə baxılacaq. Protokol təsdiq edilərsə, direktor min səkkiz yüz manatdan iki min iki yüz manatadək məbləğdə cərimələnə bilər.
Qeyd edək ki, Rəfail Mikayılov 2013-cü ildən "Zığ” Gəmi Təmiri və Tikintisi Zavodunun direktoru vəzifəsində çalışır.
