Ötən il qüvvəyə minən “Siyasi partiyalar haqqında" qanuna görə, seçkilərdən sonra partiyaların maliyyələşməsi ilə bağlı yeni qaydalar qüvvəyə minib. Əvvəlki qanunda parlamentdə təmsil olunmayan partiyalar dövlətdən yardım almaq üçün seçkilərdə ən azı 3% səs qazanmalı idi. İndi bu qayda ləğv edilib və seçkilərdə səs qazana bilən bütün partiyalar dövlətdən yardım ala biləcək.

 

Qanuna görə, dövlət tərəfindən ayrılan vəsaitin 2,5 faizi parlament seçkilərində iştirak edən və namizədləri etibarlı səs qazanan, lakin parlamentə düşməyən partiyalar arasında bərabər, yerdə qalan 2.5%-i isə həmin partiyalar arasında proporsional qaydada (yəni aldıqları səsə uyğun olaraq) bölünür.

 

Qeyd edək ki, sentyabrın 1-də keçirilən parlament seçkilərində 25 siyasi partiyanın nümayəndələri iştirak edib. Yeni Milli Məclisdə 11 siyasi partiya təmsil olunur. Beləliklə, parlament partiyaları ilə yanaşı, 14 siyasi partiyaya da maliyyə dəstəyi veriləcək.

 

Artıq bəzi partiyalara ayrılacaq maliyyə vəsaiti məlum olub. Sabiq səhiyyə naziri Əli İnsanovun partiyası da sonuncu parlament seçkilərində iştirak edib.

 

Haqq Ədalət Partiyasının sədr müavini Rəşad Abbaslı Modern.az-a açıqlamasında bildirib ki, partiyaya hələlik maliyyə vəsaiti ayrılmayıb:

 

"Haqq Ədalət Partiyasına hələki heç bir vəsait köçürülməyib. Məncə, qanun müddəası 2025-ci ilə şamil olunacaq. Lakin dəqiq bir məlumat bilmirik. Nəsə dəqiq məlumat bilinən kimi MSK-nın saytında veriləcək".