Suriyada 13 ildir davam edən vətəndaş müharibəsi hakimiyyətin məğlubiyyəti ilə başa çatdı. Prezident Bəşər Əsədin rəhbərlik etdiyi qüvvələr hakimiyyətdən uzaqlaşdırıldı, onun özü Rusiyaya qaçdı.

Vətəndaş müharibəsi zamanı Azərbaycandan da Suriyaya gedənlər olub. Onların bir hissəsi ölkəyə gətirilib.

Modern.az-a açıqlama verən Milli Məclisin deputatı Azər Allahverənov azərbaycanlıların Suriyadan gətirilməsi prosedurlarından danışıb.

O qeyd edib ki, Suriyda Vətəndaş müharibəsi zamanı müəyyən sayda Azərbaycan vətəndaşları müharibəniin getdiyi ərazilərdə olublar.

"Onlar bu ölkəyə müxtəlif kanallar vasitəsilə gediblər. Ora gedən vətəndaşlarımızdan bəzilərinin müharibə zamanı hətta əsir də düşmüşdülər. XİN-in məlumatlarına görə, vaxtaşırı, repatriasiya olunan Azərbaycan vətəndaşları ilə bağlı məlumatlar verilir. Son bir neçə ildə Azərbaycana repatriasiya olunan şəxslər barədə məlumat zaman-zaman verilir. Müxtəlif statuslardan olan  6-7 nəfərin hər il repatriasiyası ilə bağlı məlumat verilib. Repatriasoua olanlar əsasən həbsxanada olan şəxslər və kimsəsizlər evində olan uşaqlar olub.  Həmin şəxslərin qaytarılması ilə əsasən XİN məşğul olur. Bununla yanaşı digər aidiyyəti qurumların da rolu olur. Digər aidiyyəti qurumlar əvvəlcə həmin şəxslərin vətəndaşlıq mənsubiyyəti yoxlanılarkən digər aidiyyəti strukturlar bu prosesdə fəal iştirak edirlər".

Deputat bildirib ki, düşərgələrədə, həbsxanalarda, uşaq evlərində olan insanların ölkəyə qayıtması posesi başlayır.

"Həmin insanların qaytarılarkən bütün hüquq və azadlıqları təmin olunur. Müvafiq qurumlarla danışıqlar aparıldıqdan sonra həımin şəxslərin hüquq və azadlıqlarının təmin olunması istiqamətində işlər həyata keçirilir. Onlara tibbi, psixoloji yardım göstərilir. Repatriasiyanın ikinci fazasında qaytarılan şəxslərin yerli cəmiyyətə yenidən inteqrasiyası istiqamətində işlər görülür. Yəni uşaqların təhsilə cəlb olunması, böyüklərin işlə təmin olunması və sair kimi məsələlər reinteqrasiya prosesinin tərkibi hissəsidir.  Azərbaycan Respublikasının vətəndaşı kimi onların bütün hüquqları təmin edilir. Həmin şəxslər onlara verilən hüquqlardan yararlanırlar", - o deyib.

A.Allahverənov Suriyadan Azərbaycana gətirilənlərin dəqiq sayını bilmədiyini deyib.

"Say deməkdə mən çətinlik çəkirəm.  Suriyada azərbaycanlıların olması barədə məlumat şübhəsiz ki, var. KİV-də, Diasporda yayılan vaxtaşırı məlumatlarda Dəməşqdə, Hələbdə yaşayan azərbaycanlılar olduğu qeyd edilir. Qeyri-rəsmi mənbələrdə də məlumat yayılır. Onların Azərbaycana qayıtması, yaxud qaytarılması ilə bağlı  zərurət ortaya çıxarsa, bununla bağlı aidiyyəti orqanların əldə rəhbər tutacağı rəhbər qaydalar var".