2024-cü ilin sonu yaxınlaşır. Ekspertlər deyir ki, bu il avtomobil bazarında durğunluq yaşansa da, qiymətlərin artdığı müşahidə edilib.
Növbəti illə bağlı proqnozlar da səsləndirilir. Bəzi ekspertlər 2025-ci ildə avtomobillərin bahalaşacağını düşünür.
İqtisadçı ekspert Natiq Cəfərli Modern.az-a bildirib ki, Azərbaycanda avtomobil bazarında müəyyən durğunluq var:
“Amma satışların və ölkəyə gətirilən avtomobillərin həcminə baxanda ciddi keçən ilə nisbətən ciddi azalma yoxdur. Sadəcə olaraq xırda azalmalar mövcuddur. Qiymət artımına gəldikdə isə bu gələn il avtomobil şirkətlərinin verdiyi qərarlardan və Azərbaycanda ikinci əl bazarındakı vəziyyətdən. Bildiyimiz kimi Azərbaycanda bu sahədə müəyyən məhdudiyyətlər var. Benzinlə işləyən avtomobillərin ilinə görə ölkəyə gətirilmə məhdudiyyəti, hibrid və elektriklə işləyən avtomobillərdə 3 illik güzəştlər var. Geridə qalan nəqliyyat vasitələrinə isə güzəşt tətbiq olunmur. Bütün bunları nəzərə alsaq, gələn il qiymətlərdə müəyyən artımın olma ehtimalı yüksəkdir”.
Nəqliyyat eksperti Aslan Əsədov isə qeyd edib ki, ölkəmizə bu il kifayət qədər avtomobillər gətirilib:
“2024-cü ilin Azərbaycan nəqliyyat sektoruna düşərli olduğunu deyə bilərik. Çünki ölkəyə kifayət qədər avtomobillər idxal olundu və bununla bərabər yeni qaydalar da tətbiq edildi. İdxalın artmasının əsas səbəblərindən biri də taksi faəliyyəti üçün lisenziyaların verilməsi zamanı yeni hibrid avtomobillərin istismarına icazələrin verilməsi oldu. Bu nəqliyyat vasitələri özü də avtomobil parkının yenilənməsinə səbəb oldu. İlin sonuna doğru görəcəyik ki, utilizasiya prosesinin başlanması və 40-dan çox avtomobilin bu prosesə cəlb edilməsi avtomobil parkının müasirləşməsinə gətirib çıxara bilər. Ölkədə 2 milyondan çox nəqliyyat vasitəsi var, onların da 70%-nin yaşı 10 ildən çoxdur. Bu olduqca ciddi göstəricidir”.
A.Əsədov bildirib ki, qış mövsümü bu bazarda durğunluq olur:
“Bu dövrdə kütləvi alıcılıq qabiliyyəti aşağı düşür. Bazarlarımızda son dövrlər yeni qonaqla tez-tez rastlaşırıq ki, bu Çin avtomobilləridir. Hibrid avtomobil bazarında Çin dünyada ilk yerlərdə qərarlaşıb. Azərbaycanda da bu avtomobillərin idxalına kifayət qədər maraq var. Bu avtomobillər Azərbaycan bazarında öz yerini tuta bilir. Ölkəmizdə bu avtomobillərin kifayət qədər servisləri açılır, ehtiyat hissələrinin satışı həyata keçirilir. Keçən il və bu il arasındakı əsas fərq müəyyən ödənişlərin tətbiq olunmasıdır. Bu ödənişlər isə çox ciddi dəyişiklik yaratmır. Ümumi topladıqda 150-200 manat aralığında əlavə rüsum və digər ödənişlər müşahidə edilir. Qiymət artımına gəldikdə isə bu gələn il avtomobil şirkətlərinin verdiyi qərarlardan və Azərbaycanda ikinci əl bazarındakı vəziyyətdən asılıdır”.
