Bakı-Balakən-Bakı marşrutunun bərpası ilə gecə səfərlərinə start verilir. Yataq tipli qatarlar 3 yanvardan etibarən hər gün saat 23:50-də Bakıdan Balakənə, 4 yanvardan isə saat 22:10-da Balakəndən Bakıya hərəkət edəcək. Marşrut üzrə qatarlar Biləcəri, Yevlax, Şəki, Göynük, Qax, Qorağan, Əliabad, Zaqatala, Göyəm və Balakən olmaqla 10 stansiya və dayanacaqda saxlayacaq.
Qeyd edək ki, hazırda Azərbaycan dəmir yolunun şimal-qərbdə son stansiyası Balakəndir. Bu stansiya ötən əsrin 80-ci illərinin əvvəllərində işə salınıb. Bakı- Balakən sürət qatarının açılması paytaxtla şimal-qərb bölgəsi arasında gediş-gəlişi daha da asanlaşdıracaq.
Bu marşrut üzrə biletlər üç kateqoriyada təklif edilir: standart (18 AZN), standart+ (27 AZN) və biznes sinif (72 AZN). Sosial şəbəkələrdə bəzi istifadəçilər qatar biletlərinin qiymətləri avtobus biletləri ilə müqayisə edilir. Lakin ekspertlər bu yanaşmanın doğru olmadığını düşünür, çünki dəmir yolu səyahəti yalnız məsafəyə deyil, həm də təhlükəsizlik, komfort və təqdim olunan xidmətlərə görə qiymətləndirilir.
Mövzu ilə bağlı Modern.az-a danışan nəqliyyat məsələləri üzrə ekspert Rauf Ağamirzəyev bildirib ki, qatarda hər kəsin seçim imkanı var:
“Bilet qiymətləri standart, "standart+" və biznes sinif şəklində satılır. Ən ucuzu standart, daha sonra "standart+" olanlardır. Hər kəs cibinə uyğun yer taparaq səyahət edə bilir. Burada əsas məsələ odur ki, seçim imkanı var.. Eyni zamanda vaqonların daxili tərtibatında da müəyyən fərqlər mövcuddur, standart sinifdə 6-8, "standart+"da 4, biznes sinif isə 2 nəfərlik olur. Eyni zamanda biznes sinifdə televizor çay, yemək və sair təkliflər olur. Bu təkliflər digər siniflərdə olmaya bilər, bu da ödənilən məbləğlərə təsir edir”.
Müsahibimiz qeyd edib ki, Bakı-Balakən qatarının bərpa olunması sevindirici haldır:
“Deyərdim ki, 5 il bundan qabaq mövcud olan bütün gecə reysləri bərpa olunsun. Bu zaman insanlarda əminlik yaranır ki, gündüz qatarına çatmasa da, gecə qatarına gəlib çata biləcək. Regionlardan Bakıya gecə gələn qatarlarda vaxt səmərəli istifadə olunur. Regionlardan şəhərə gələn insanlar üçün bu üsul çox rahatdır. Səhər gəlib işini görür və eyni qatarla da qayıda bilir. Ona görə də düşünürəm ki, digər istiqamətlərdə də hərəkətlər bərpa olunmalıdır. Köçərli istiqaməti, Horadiz istiqamətində də marşrutlar açıla bilər”.
