Dekabrın 25-də AZAL-ın Bakı-Qroznı reysini yerinə yetirən sərnişin təyyarəsi Qazaxıstanın Aktau şəhəri yaxınlığında qəza enişi edib. Təyyarədə 62 sərnişin, 5 ekipaj üzvü olub. Qəza nəticəsində 38 nəfər həlak olub. Onlardan 26-sı Azərbaycan vətəndaşlarıdır.
Qeyd edək ki, təyyarə Rusiyanın hava məkanında kənar müdaxiləyə məruz qalıb. Mətbuatda gedən məqalələrdə bildirilib ki, AZAL təyyarəsi Rusiyanın "Pantsir S1" hava hücumundan müdafiə sisteminin hücumuna məruz qalıb.
Hadisə ilə əlaqədar Rusiya Prezidenti Vladimir Putin dekabrın 28-də Azərbaycan Prezidenti İlham Əliyevə zəng edib. Putin dekabrın 25-də Bakı-Qroznı marşrutu üzrə uçuş yerinə yetirən “Azərbaycan Hava Yolları”na məxsus sərnişin təyyarəsinin Rusiyanın hava məkanında fiziki-texniki xarakterli kənar müdaxiləyə məruz qalması və nəticədə baş vermiş faciəvi hadisə ilə bağlı üzrxahlığını ifadə edib, bu qəzada həlak olanların ailələrinə və yaxınlarına dərin və ən səmimi başsağlığını bir daha çatdırıb, xəsarət alanların tezliklə şəfa tapmasını dilədiyini deyib.
Prezident İlham Əliyev “Azərbaycan Hava Yolları”na məxsus sərnişin təyyarəsinin Rusiyasının hava məkanında olan zaman kənar fiziki-texniki müdaxiləyə məruz qaldığını və idarəetməsini tam itirdiyini, Qazaxıstanın Aktau şəhərinə doğru yönləndirildiyini, yalnız pilotların şücaəti və peşəkarlığı sayəsində qəza enişi edə bildiyini qeyd edib. Dövlətimizin başçısı təyyarənin gövdəsində çoxsaylı dəliklərin olmasının, hələ havada olarkən sərnişinlərin və heyət üzvlərinin təyyarənin göyərtəsini dəlib içəri daxil olan yad hissəciklərlə yaralanmalarının, bu xüsusda, sağ qalan təyyarə bələdçilərinin və sərnişinlərin ifadələrinin kənar fiziki-texniki müdaxilə faktını təsbit etdiyini vurğulayıb.
Söhbət zamanı dövlət başçıları bu faciənin bütün təfərrüatlarının ciddi və hərtərəfli araşdırılması, günahkarların məsuliyyətə cəlb olunmasını müzakirə ediblər.
Prezident İlham Əliyev bildirib ki, Azərbaycan tərəfinin təklifi ilə bu qəzanın səbəblərinin hərtərəfli araşdırılması üçün beynəlxalq ekspertlərdən ibarət heyət təşkil edilib və bu heyət artıq fəaliyyətə başlayıb.
Dövlət başçıları, həmçinin faciə ilə əlaqədar başlanılmış istintaq prosesinin tam şəffaf şəkildə aparılacağını və mütəmadi qaydada ictimaiyyətə məlumat veriləcəyini vurğulayıblar.
Dünyanın nəhəng media qurumlarının bugünkü manşet xəbərlərində Putinin İlham Əliyevə zəng edərək üzr istəməsi yer alıb.
ABŞ-nin gündəlik ictimai-siyasi qəzeti olan “The Whashington post” yazır: “Rusiya Prezidenti Vladimir Putin sərnişin təyyarəsinin Qazaxıstanda qəzaya uğramasından sonra Rusiya hava sahəsində baş verən “faciəvi hadisə” ilə bağlı Azərbaycanın liderindən üzr istəyib, – Kremlin şənbə günü açıqlamasında bildirilib”.
"British Broadcasting Corporation" (BBC) də Azərbaycana Hava Yollarına məxsus təyyarənin 25 dekabr Qroznıya gedərkən kənar müdaxilə nəticəsində Aktau hava limanı yaxınlığında qəza enişi etməsinə görə Putinin üzr istədiyini yazır.
"The New York Times" qəzetinin manşet bölməsində də “Putin Qazaxıstandakı Qəza üçün Azərbaycan Respublikasının Prezidenti İlham Əliyevdən üzr istədiyini vurğulayıb.
Məqalədə deyilir: “Rusiya Prezidenti Vladimir Putin telefon danışığı zamanı Azərbaycan lideri İlham Əliyevə “faciəvi hadisənin Rusiya hava sahəsində baş verdiyini” deyib.
Rusiya Prezidenti Vladimir Putin şənbə günü Azərbaycan Hava Yollarına məxsus təyyarənin qəzasına görə üzr istəyib və 38 nəfərin həyatına son qoyan qəza ilə bağlı Kremlin üçgünlük sükutunu pozub”.
