Yeni il gecəsini evdə keçirəcəksinizsə, masalar sağlam və yüngül yemək seçimlərindən ibarət olmalıdır. Evdən kənarda olanlara az yağlı və kiçik porsiyalar olan sağlam menyular seçmələri tövsiyə olunur.

Yeni il bayramına son günlər qalıb. Bayramda insanların diqqət etməli olduğu məsələlərdən biri də qidalanmadır.

Bayram zamanı necə qidalanmalı? Nələrə diqqət etməliyik?

Modern.az mövzu ilə bağlı qida eksperti Fərid Səfərovla həmsöhbət olub.

Onun sözlərinə görə, ilin son gününə erkən başlanmalı və səhər yeməyi yeyilməlidir:

“Səhər yeməyindən 1-2 saat sonra ən azı bir saat açıq havada sürətli gəzintiyə çıxmalı və sonra 1-2 saat istirahət etməlisiniz. Yemək vərdişlərində heç bir dəyişiklik olmamalıdır. Gün ərzində qan şəkərini balanslı tutmaq və maddələr mübadiləsi sürətinin yavaşlamasını qarşısını almaq üçün qəlyanaltı olaraq meyvə, 10-15 ədəd fındıq və ya badam, 2-3 ədəd qoz yemək olar”.

Ekspert qeyd edib ki, Yeni il süfrəsində çox ac oturmaq olmaz. Aclıq həddindən artıq qida istehlakına səbəb olur:

“Təkcə Yeni il süfrəsində yox, bir vərdiş halına gətirərək həmişə yeməklər kiçik hissələrdə yavaş-yavaş yeyilməlidir. Bununla yanaşı, şəkərli və qazlı içkilər, hazır meyvə suları içməyin. Əvəzinə normasında, sevdiyiniz və özünüzün hazırladığınız təzə meyvə suyu içmək olar. Alkoqol istehlakı isə məsləhət görülmür. Təzə meyvə və qoz-fındıq yeməkdən sonra axşam saatlarında həddindən qida qəbul edilməməlidir. Ehtiyacdan asılı olaraq gün ərzində 10-12 stəkan su içməyə diqqət yetirilməli, sağlam və balanslı qidalanma bir gecəlik deyil, ömürlük prinsip kimi qəbul edilməlidir”.