2025-ci ildə baş verəcək astroloji hadisələr bürclərə də təsirsiz ötüşməyəcək.
Modern.az 2025-ci il üçün astroloqların bürclər haqqında proqnozlarını və bürclərə təsirlərini təqdim edir.
"Saturn" peyki 2023-cü ilin mart ayında Balıqlar bürcünə keçib və bu təsir 2025-ci ilə qədər davam edəcək. "Saturn"un Balıqlarda olması yaradıcılıq, mənəvi inkişaf və emosional tarazlıq üzərində fokuslanmağa səbəb olacaq. Bu dövr su bürclərinə, yəni Xərçəng, Əqrəb, Balıqlara nizam-intizam və struktura daha çox diqqət yetirməyi öyrədəcək. Xüsusilə Balıqlar və Xərçəng bürcləri üçün bu dövrdə özünü tapmaq və emosional problemlərin həlli üçün əhəmiyyətli olacaq. Oğlaq və Qız bürcləri də bu təsirdən faydalanaraq daha çox nizam-intizamlı, həmçinin işdə strukturlaşmaya meylli ola bilərlər.
Digər hadisələrdən biri isə "Pluton"un Dolça bürcünə keçididir. "Pluton" 2024-cü ildə Dolça bürcünə keçib və 2025-ci ildə də bu transit öz təsirini göstərməyə davam edəcək. Uzunmüddətli dövr texnologiya, sosial dəyişikliklər və cəmiyyətin ümumi strukturlarında böyük transformasiyalara səbəb olacaq. Dolça, Əkizlər və Tərəzi bürcləri bu transformasiyanı daha çox hiss edəcək, texnoloji, sosial yeniliklərə daha açıq olacaqlar. Şir və Buğa bürcləri də dəyişikliklərə adaptasiya olmağa çalışacaqlar.
Yupiterin Əkizlər bürcünə keçidi də 2025-ci ildə baş verəcək astroloji hadisələrdən biridir .2025-ci ilin may ayından Əkizlər bürcündə olacaq Yupiter təhsil, ünsiyyət, əlaqələr və səyahətlə bağlı yeni imkanlar gətirəcək. Əkizlər, Tərəzi və Dolça bürcləri bu təsirdən faydalanaraq genişlənmə, yeni əlaqələr qurma sahəsində uğur qazana bilərlər. Oxatan və Balıqlar isə bu enerjidən yararlanaraq şəxsi inkişaflarına fokuslana bilərlər.
2025-ci ildə Karmik Ay düyünlərinin dəyişməsi də baş tutacaq. İlin əvvəlində Qoç-Tərəzi oxunda olan karmik düyünlər Balıqlar-Qız oxuna keçəcək. Bu zamanı əlaqələr və şəxsiyyətlə bağlı dərslərdən daha çox gündəlik həyatla bağlı mövzular ön plana çıxacaq. Bu keçid Balıqlar və Qız bürcləri üçün taleyüklü dəyişikliklərə səbəb ola bilər, karyera və şəxsi həyatla bağlı mühüm qərarlar verilə bilər.
Hər il olduğu kimi bu il də Günəş və Ay tutulmaları da qeydə alınacaq. Xüsusilə mart və sentyabr aylarında baş verəcək tutulmalar karyera, ailə və şəxsi həyatda mühüm dəyişikliklərə gətirib çıxaracaq. Bu tutulmalar Qız, Balıqlar, Oxatan və Əkizlər bürclərinə daha çox təsir edəcək. Onların həyatında yeni istiqamətlər açılaraq bəzi köhnə problemləri həll etmək üçün imkanlar yaranacaq.
Fidan Eldarova
