“Bu gün xalqımız Azərbaycanın Milli Qəhrəmanı, general-mayor Polad Həşimovun 50 illik yubileyini qeyd etdi. Müxtəlif yaşda olan ziyarətçilər öz generalına ehtiramını göstərdi. Allahdan oğlum Polad Həşimov başda olmaqla cəmi şəhidlərimizə rəhmət diləyirəm. Uca Yaradan xalqımızı, Ordumuzu qorusun”.

 

Modern.az AZƏRTAC-a istinadən xəbər verir ki, bunu jurnalistlərə açıqlamasında Milli Qəhrəman Polad Həşimovun anası Səmayə Həşimova deyib.

 

"Polad Həşimov sadəcə bizim qardaşımız idi. Şəhid olduqdan sonra hər kəsin qardaşı, hər kəsin oğlu oldu" deyən general-mayorun bacısı Kəmalə Həşimova isə fikirlərinə belə davam edib: "Polad həm çox mərhəmətli, həm də mərd və qorxmaz idi. O, bu həyatda cəmi 45 il yaşadı. Amma qısa ömrünə elə şeylər sığdırdı ki... Polad Həşimovun şəhadəti xalqımızın ayağa qalxıb öz torpaqlarını azad etməsi üçün bir qığılcım oldu. Demək ki, o öz ömrünü ən mənalı şəkildə yaşadı, ən gözəl şəkildə də başa vurdu. Hər kəs qəhrəman ola bilmir. O, Vətənini hər şeydən çox sevdi və bütün həyatını Vətəninə qurban verdi. Polad yaxşı ki, mənim qardaşımdır və mən yaxşı ki, onun bacısıyam. O, öz əxlaqı, mərdliyi, igidliyi ilə bir simvola çevrildi".

 

Şəhidin həyat yoldaşı Ofeliya Salmanova Polad Həşimovun öz şəhadəti ilə Azərbaycan tarixində çox önəmli, yeni səhifə açdığını vurğulayıb: "Onun şəhadəti Azərbaycan xalqının Zəfərə gedən yolunun başlanğıcı oldu. Biz Milli Qəhrəmanımızla qürur duyuruq. Mən bilirəm ki, Azərbaycan xalqı onun xatirəsini daim qəlbində yaşadacaq. Tək belə önəmli günlərdə yox, hər zaman Polad Həşimov Azərbaycan xalqının yaddaşında qalacaq. Onun Azərbaycan Ordusunda göstərdiyi əvəzsiz xidmətlər xalqımız tərəfindən yüksək qiymətləndirilir. Həm generalımıza, həm də ərazi bütövlüyümüz və suverenliyimiz naminə canından keçən qəhrəmanlara böyük ehtiramla sədaqətimizi bildirir və onların ruhları qarşısında baş əyirik".