Səhiyyə Nazirliyi Bakıda yerləşən "German Hospital" adlı özəl xəstəxanada əməliyyat zamanı cərrahın ad gününün qeyd edilməsinə münasibət bildirib.

Nazirliyin Analitik Ekspertiza Mərkəzindən (AEM) Modern.az-a verilən məlumata görə, faktla bağlı yoxlamalara başlanılıb. Qurumdan məsələnin ciddi araşdırılacağı bildirilib.

Açıqlamada qeyd olunub ki, yoxlamanın nəticəsi barədə ətraflı məlumat veriləcək.

 

***

16:35

Bakı yerləşən özəl xəstəxanlardan birində həkim əməliyyat zamanı doğum gününü qeyd edib.

Həkim bu barədə öz "Instagram" hesabında paylaşım edib.

Hadisə "German Hospital"da baş verib. Əməliyyat zamanı doğum günü qeyd edilən həkim xəstəxananın cərrah mama-ginekoloqu Ləman Əliyeva olub.

Görüntülər sosial şəbəkələrdə müzakirələrə səbəb olub. Qeyd edək ki, məlumatı "Oxu.az" saytı yayıb.

Modern.az mövzu ilə bağlı Ləman Əliyeva ilə əlaqə saxlayıb.

O bildirib ki, hadisənin ümumiyyətlə onunla əlaqəsi yoxdur:

“Doğum günümdə əməliyyat sona çatanda özümün də xəbərim olmadan tibb bacıları mənə sürpriz etmək istəyiblər. Orada da artıq əməliyyat sona çatmışdı, xəstənin tikişləri qoyulmuşdu. Tibb bacıları özləri də sanitar geyimdə idilər”.

L.Əliyeva bildirib ki, o heç vaxt hansısa xəstənin həyatını riskə atacaq addım atmayıb:

“Mən nə üçün xəstənin həyatını təhlükəyə atım?! Həmin xəstə də hazırda xəstəxanada yaxşı vəziyyətdədir. Mənim yoldaşım Əziz Rəfibəyli özü orada doğuş şöbəsinin müdiridir, niyə belə bir şey edim?! Bu sadəcə qısqanclıq, paxıllıqdır. Biz özümüz sanitariya qaydalarını yaxşı bilirik və hər zaman əməl edirik. Üstəgəl də bu mənim xəbərim olmadan olan bir şey idi”.