Ötən il dekabrın 19-da İranın ali rəhbərinin Ərdəbil vilayəti üzrə nümayəndəsi, Ərdəbilin imamcüməsi Seyid Həsən Amulinin iştirak etdiyi və İranın Radio və Televiziya Təşkilatının “Xəbər Şəbəkəsi” kanalında yayımlanan tədbirdə Azərbaycana və dövlət başçısına qarşı təhqiramiz ifadələr səsləndirilib. Azərbaycan Amulinin və əlaltılarının bəyanatlarına layiqli cavab verib.
İranın Xarici İşlər Nazirliyi Amulinin açıqlamalarından təəssüfləndiyini bildirib. Prezident İlham Əliyev yerli telekanallara müsahibəsində bildirib ki, təəssüf hissi kifayət deyil.
"Burada açıq təhqir olub: həm Türkiyə, həm Azərbaycan prezidentləri, həm bizim xalqlar və rəsmi tədbirdə canlı yayım gedən zaman və sadəcə, təəssüf?! Bu, əlbəttə ki, qəbuledilməzdir. Ona görə biz hesab edirik ki, o əyalət mollası cəzalandırılmalıdır. Ən azı vəzifəsindən qovulmalıdır və Azərbaycandan üzr istəməlidir. Bax, məsələ bundadır".
Təxribatçı çıxışlardan sonra Təbrizdə Azərbaycan Prezidenti İlham Əliyev və Türkiyənin dövlət başçısı Rəcəb Təyyib Ərdoğanın şəkilləri şəhərin müxtəlif yerlərində divarlara vurulub.
Fotoların üzərində "Yaşasın Qarabağ qəhrəmanı Əliyev başqan!" və "Yaşasın Şam fatehi Ərdoğan rəis!" yazılıb.
Güney Azərbaycan Milli Hərəkatının fəalları belə bir etiraz aksiyası ilə Seyid Həsən Amuli və onun əlaltılarının Azərbaycan və Türkiyə liderlərinə qarşı təhqiramiz ifadələrinə öz etirazlarını bildiriblər. Eyni zamanda Türkiyə və Azərbaycana dəstəklərini bəyan etməyə çalışıblar.
Modern.az-a danışan Milli Məclisin komitə sədri Musa Quliyev bildirib ki, İran hökuməti Azərbaycana qarşı siyasi münasibətlərində korrektələr etməlidirlər:
“Çox təəssüf edirəm ki, İran dövləti öz qonşuluq münasibətələrini səmimi ifadə etmir. Azərbaycana qarşı münasibətlərində çox zaman riyakar davranır. İstər səfirliyimizə qarşı onların terror təşkil etməsi və səfirlik əməkdaşlarımızın birinin öldürülüb ikisinin yaralanmasında, Azərbaycan deputatına sui-qəsd təşkil edilməsində və Azərbaycanı hədələmək üçün sərhədlərimizə qoşun yığması, Zəngəzur dəhlizi məsələsində hər zaman bu İranın qırmızı xəttidir deyərək əngəl törətməsində görürük. Amulinin tədbiri zamanı bizim və Türkiyə prezidenti barədə ağzına gələni deməsi və təhqiramiz ifadələrinin işlədilməsi nə Amulinin nə də orada çıxış edənlərin daşıyacağı cinayət deyil. Yəni bunun arxasında duranlar əlbəttə var. Ona görə də cənab Prezident yerli mediayaya müsahibəsində çox açıq şəkildə və net olaraq söylədi ki, Amulinin özü məsuliyyət daşımırsa, onda onu bura təyin edən şəxs məsuliyyət daşımalıdır".
Komitə sədri qeyd edib ki, Amuli təsadüfi deyil, Xamaneyinin təyin etdiyi adamdır:
"İranın dini lideri ölkənin siyasi kursunu müəyyən edən şəxsdir. İran indiyə qədər səmimi olsaydı, həmin Amuli də vəzifəsindən götürülərdi, həmin şəxsə qarşı da tədbir görülərdi. Ondan İranın səmimiyyətinə inanardıq. Cənab Prezident də söylədi, səfirliyimizə hücum edən şəxsi İran hökuməti bu günə qədər bu və ya digər şəkildə müdafiə olunur. Onun barəsində çxıarılan edam hökmü indiyə qədər icra olunmyıb, yenidən istintaqa qaytarılıb. Bu belə davam edə bilməz. Həm qonşu olasan, guya ki bir dinin, mədəniyyətin daşıyıcısı olan iki ölkə olaq və belə qeyri-səmimi münasibət bəslənilsin. 30 illik işğal dövründə İran dildə Azərbaycanın ərazi bütövlüyünü dəstəklədiyini bəyan edirdi, amma əməldə həmişə Ermənistana kğmək edib. Bu mənada hesab edirəm ki, İran dövləti və hökuməti Azərbaycana qarşı siyasi münasibətlərində ciddi korrektələr etməli və qonşuluq siyasətinə uyğun davranmalıdır”.
M.Quliyev güneyli soydaşlarımızın hadisədən sonra atdığı addımlar barədə də danışıb:
“Cənubda soydaşlarımız çox ağır şərtlər altında yaşayırlar. Onların azadlıqları demək olar ki, yoxdur. Öz dilində danışmaq, təhsil almaq, qəzet buraxıb, televiziya açmaq hüquqları yoxdur. Bu dünyada nadir hadisələrdən biridir ki, 40 faizdən artığını təşkil edən toplumun belə hüquqları yoxdur. İran dövləti buna fikir verməlidir. Zaman-zaman Cənubi Azərbaycanda yaşayan qardaşlarımızın fədakar hərəkətlərini görmüşük. Bu İran hakimiyyətinə, Amuliyə özünüzü yığışdırın mesajıdır. Bu mesaj onların çox ciddi etirazlarla qarşılaşa biləcəklərinin siqnalını verir. Bu onu da göstərir ki, Cənubi Azərbaycanda Türkiyə və Azərbaycan liderlərinə qarşı olduqca böyük sevgi var. Bu sevgi lazım gələrsə, bizə qarşı hədyanlara qarşı cavab verə biləcək enerjidir”.
Sonda komitə sədri iranlı deputat həmkarlarına çağırış edib:
“Təkcə deputatlara deyil, İran ictimaiyyətinə, xalqına, ölkənin siyasətini yönəldən insanlara münasibətimiz necədirsə, onlar da elə davransınlar. Bu, bəs edər. Yəni səmimi qonşuluq və dostluq münasibətləri olmalıdır. İrandakı proseslər göstərir ki, artıq bu ölkədə şovinist, imperialist siyasət demək olar iflasa uğrayıb. Ayıq-sayıq olmalıdırlar. Münasibətləri qorumaqdan ötrü, beynəlxalq normalar və əxlaq çərçivəsində münasibətlərə riayyət etməlidirlər”.
