Hazırda Azərbaycan və Ermənistan arasında sülh danışıqları həyata keçirilir. Sülh mətninin razılaşdırılması üçün işlər görülür. Böyük ehtimalla gec-tez sülh əldə olunacaq, ancaq istənilən halda, sülh müqaviləsi imzalansa da, münasibətlər normalaşsa da biz tariximizi qətiyyən unutmamalıyıq.
Bunu Modern.az-açıqlamasında Milli Məclisin deputatı Naqif Həmzəyev bildirib.
O qeyd edib ki, ötən əsr ərzində, birinci və ikinci Qarabağ savaşı zamanı azərbaycanlılara qarşı törədilmiş hərbi cinayətləri, soyqırımları, vəhşilikləri qətiyyən unutmamalıyıq.
"Bilirik ki, Azərbaycana qarşı bir çox hərbi cinayətlər törətmiş keçmiş separatçıların rəhbərləri, eyni zamanda Xocalıda və digər soyqırımlarda iştirak etmiş erməni cinayətkarların bəziləri hazırda Azərbaycanda həbsdədirlər və qanun qarşısında cavab verirlər. Ancaq onlar cinayət törətmiş erməni daşnakların bir hissəsidir. Bir çox cinayətkarlar var ki, onların adları, kimlikləri, törətdikləri cinayətlərə dair faktlar Azərbaycan Xüsusi Xidmət Orqanlarına bəllidir və onlar beynəlxalq axtarışa verilib. Ermənistan tərəfi də həmin cinayətkarları çox yaxşı tanıyırlar. Həmin cinayətkarların bu günə qədər gizlənməsi, həbs olunmamasının bəlkə də əsas səbəbi elə Ermənistan dövləti özüdür. Məhz həmin cinayətkarlar mütləq Ermənistan tərəfindən Azərbaycana təhvil verilməlidir. Onların ədalətli mühakiməsi həyata keçirilməlidir”.
Millət vəkili bildirib ki, Azərbaycan tarixinin öyrənilməsi, təbliğ edilməsi, Azərbaycan həqiqətlərinin dünyaya çatdırılması ilə əlaqədar işlərimizi daha gücləndirməyə çalışmalıyıq:
“Bu proseslərdə Azərbaycan diaspor nümayəndələri, xaricdə yaşayan azərbaycanlılar yaxından iştirak edə bilər. Eyni zamanda xarici mütəxəssislərlə birlikdə Azərbaycan Universitetləri tədqiqat işləri həyata keçirə bilər. Bu tədqiqatın nəticələri mütləq ictimaiyyətə açıqlanmalıdır. Həmçinin Türkiyə tərəfi öz arxivlərini açıb, biz Gürcüstan arxivlərindən də istifadə edə bilirik. Ermənistan da gec-tez öz arxivlərini açmalıdır və həqiqətlər işıq üzü görməlidir. Faktiki olaraq Ermənistan yalançı, qondarma erməni tarixinin təbliğindən əl çəkməlidir. Cənubi Qafqazda uzun müddətli və dayanıqlı sülhü əldə etmək istəyiriksə, Ermənistan siyasi rəhbərliyi, eyni zamanda tarixçiləri və siyasətçiləri reallıqları qəbul etməli və real mövqedən çıxış etməlidirlər ki, bir daha münasibətlərimiz gərginləşməsin. Ermənistan qətiyyən xarici qüvvələrin təsiri altına düşməməlidir. Biz də qətiyyən tariximizi unutmamalıyıq və çalışmalıyıq ki, münasibətlərimiz normallaşacağı təqdirdə belə real tarixin təbliğini həyata keçirək. Gələcək nəsillər bizə qarşı törədilən bütün cinayətləri, soyqırımları bilməlidirlər. Eyni zamanda Qərbi Azərbaycanlıların da öz dədə-baba yurdlarına qayıtmasına, öz torpaqlarında yaşama hüquqlarının bərpa edilməsinə nail olmalıyıq”.
