Bələdiyyə seçkilərinin keçiriləcəyi tarixə sayılı günlər qalıb. Ölkə üzrə əvvəllər mövcud olan bələdiyyə sayı yarıya qədər azalaraq 685-ə enib. Müzakirə mövzularından biri də ləğv edilən bələdiyyələrdə çalışanların taleyi ilə bağlıdır.
Mövzu ilə bağlı Modern.az-a danışan Milli Məclisin Regional məsələlər komitəsinin sədri Siyavuş Novruzov bildirib ki, qanunvericiliyə əsasən 3000 nəfər əhalisi olan bələdiyyələr formalaşdırılır:
“Hər bələdiyyənin özünün işçiləri var idi. Seçkilər bitəndən və bələdiyyələr formalaşdıqdan sonra bu məsələ gündəmdə olacaq. Hazırda əvvəlki bələdiyyələr öz fəaliyyətindədir. Seçkilər bitdikdən, nəticələr elan olunduqdan sonra yeni bələdiyyə rəhbərliyi aparatlarını formalaşdıranda çalışacaqlar ki, işçilərdən maksimum dərəcədə istifadə edilsin".
Komitə sədri bildirib ki, 1300-dən çox bələdiyyənin 8 milyondan çox borcu var:
“Bununla bağlı biz məsələ qaldırmışıq. Büdcə ilə bağlı da məsələ qaldırdıq ki, yeni bələdiyyələr fəaliyyətə başlayanda çətinlik yaşamasınlar. Verilən dotasiyalar və subvensiyalar borcların bağlanması üçün nəzərdə tutulmayıb. Bu məsələ ilə bağlı qarşılıqlı müzakirələr gedir. Problemlərin aradan qaldırılması, yeni bələdiyyələrin heç bir borcu olmadan fəaliyyətə başlaması üçün fəaliyyət göstərilir”.
