Bakı şəhərindəki “Rus evi” fəaliyyətini dayandırır. Artıq binanın boşaldıldığı barədə xəbərlər yayılıb. Rəsmi açıqlamada deyilir ki, “Rus evi” Azərbaycan Respublikası Xarici İşlər Nazirliyinin tələbi əsasında fəaliyyətini dayandırmaq üçün tədbirlər görür.
Qeyd edək ki, “Rossotrudniçestvo”nun Azərbaycandakı nümayəndəliyi olan Rusiya İnformasiya-Mədəniyyət Mərkəzi – “Rus evi”nin hüquqi şəxs qismində qeydiyyatının mövcud olmadığı və təşkilatın Azərbaycan qanunvericiliyini ciddi şəkildə pozduğu barədə Rusiya tərəfinə məlumat verildikdən sonra rəsmi Bakı fevralın 3-də “Rus Evi”nin fəaliyyətinə xitam verilməsi barədə Rusiya tərəfinə nota göndərib.
XİN-in məlumatında bildirilib ki, Azərbaycan ərazisində bu kimi təşkilatların fəaliyyəti milli qanunvericiliyə, ölkələr arasında qarşılıqlılıq prinsipinə və ikitərəfli əsasda əldə olunmuş razılıqların tələblərinə uyğun olaraq tənzimlənir. Azərbaycan tərəfinin ölkədə “Rus evi”nin fəaliyyətinə xitam verilməsi barədə qərarından irəli gələrək Rusiya tərəfindən bu istiqamətdə müvafiq tədbirlərin həyata keçirilməsi gözlənilir.
Modern.az-ın məlumatına görə, Bakıda Rusiyaya məxsus daha bir mərkəz var. Azadlıq prospekti ilə Həsən Əliyev küçəsinin kəsişməsində yerləşən Rus Mədəniyyət Mərkəzinin binası hələ də fəaliyyətini davam etdirir.
Mərkəz 2018-ci ildə əsaslı təmirdən sonra yenidən aktiv fəaliyyətə başlayıb. Ötən illər ərzində Mərkəz tərəfindən rus dili ölkə ərazisində təbliğ edilməsi əsas prioriteti hesab olunurdu. Bundan əlavə Rus Mədəniyyət Mərkəzi rus mədəniyyətinin və ədəbiyyatının, ənənə, adət və mərasimlərin qorunub saxlanması, inkişaf etdirilməsi və təbliği əsas məqsədinə çevrilib
Mərkəz rus mədəniyyətlərinin görkəmli xadimlərinin yaradıcılığına həsr edilmiş ədəbi və musiqili tədbirlər, pravoslav bayramları şərəfinə konsertlər təşkil edir.
Rus İcması bildirir ki, Mərkəzdə müntəzəm olaraq rus rəssamlarının əsərlərinin sərgiləri, Azərbaycanda yaşayan rus yazıçı və şairlərinin kitablarının təqdimatı, Rusiyanın mədəniyyət xadimləri ilə yaradıcılıq görüşləri keçirilir.
