“Dövlət hesabına rus dilində təhsillə bağlı çox müsahibələr vermişəm. Azərbaycan müstəqilliyini qazanandan sonra milli ziyalılarımız tərəfindən bununla bağlı çox müraciətlər olub. Onlar rus dilində təhsilin Azərbaycanda bu qədər yayılmasının yaxşı hal olmadığını qeyd edirdilər. Bu gün də gəlinən nəticələri görürsünüz”.

Bu barədə Modern.az-a açıqlamasında deputat Tənzilə Rüstəmxanlı bildirib.

Onun sözlərinə görə, burada məsələ rusdilli təhsilə qadağa qoyulması ilə bitmir:

“Harada qadağa qoyursan qoy, millət təfəkküründə öz ana dilini xor görür, evində rus dilində danışır, rus dilini elit bir dil hesab edərək özləri üçün ən üstün xüsusiyyət hesab edirlər.  Nazirliklərimizin çoxunun koridorlarında rus dilində danışırdılar. Bu millətin şüurunda dəyişməlidir. Bu gün sözügedən məsələyə kəskin münasibət göstərir. Bir millət üçün ən önəmli xüsusiyyətlərdən biri dildir. Bu dili qoruyub saxlamaq lazımdır”.

T.Rüstəmxanlı qeyd edib ki, əvvəldən rayonlardan gələn, tər-təmiz Azərbaycan dilində danışan insanlarımıza xor baxılırdı:

“Məsələn öz dilində, bölgələrimizin şivəsi ilə danışanları ələ salırdılar. O təfəkkür bu gün də var. Rus dilində məktəblərdə oxuya bilərsən, amma ailələr evində övladına ana dilini öyrədə bilmirsə, sadəcə milliyəti və görüntüsü azərbaycanlıdır. Onların təfəkkürü də, fikri də ruscadır. Öz ana dilində danışa bilməmək siyasətçi, siyasi-ictimai xadim, millət vəkili, yaxud sadə vətəndaş olmasından asılı olmayaraq çox böyük ayıbdır.

Məni narahat edən məsələlərdən biri Sabir müəllimlə (Sabir Rüstəmxanlı - red.) mənə münasibət idi. Biz ən çox təhqirə və hücuma Rusiyanın 5-ci kolonu tərəfindən məruz qalmışıq. Amma bu gün bu münasibətlərin pozulması üçün ən çox canfəşanlıq edən rusca düşünüb danışan özü elit hesab edənlərdir. Mən Rusiya ilə Azərbaycan münasibətlərinin pisləşməsini istəmirəm. Bütün bu böhranlardan, münaqişələrdən və gərginlikdən çıxmağın yolunu cənab Prezidentimiz bilir”.