Xəbər verdiyimiz kimi, Vətən müharibəsi şəhidi Xudayar Yusifzadənin anası Radə Qurbanovanı sosial şəbəkələrdə təhqir edən şəxs həbs edilib.
Radə Qurbanovanın şikayəti əsasında 1993-cü il təvəllüdlü Vüqar İ. saxlanılaraq, barəsində İnzibati Xətalar Məcəlləsinin 510-cu maddəsi ilə protokol tərtib edilib və iş məhkəməyə göndərilib.
Məhkəmədə məlum olub ki, "TikTok" sosial şəbəkəsində "Şah_əmlak" adı ilə qeydiyyatdan keçən əmlak blogeri Vüqar evlərin alqı-satqısı ilə bağlı elanlar yerləşdirib. Vüqarın profilində Radə Qurbanova və digər şəhid analarının barəsində xoşagəlməz şərhlər yazılıb. Radə Qurbanova əmlak blogerinə zəng edərək, öz etirazını bildirib və barəsində şikayət edəcəyini deyib. Sonuncu heç kimdən qorxmadığını və baş vermiş hadisə ilə bağlı izahat verməyəcəyini şəhid anasına deyib.
Modern.az məsələ ilə əlaqədar şəhid Xudayar Yusifzadənin anası Radə Qurbanova ilə əlaqə saxlayıb.
O deyib ki, hadisə dekabrın 14-də, oğlunun toyunun ertəsi gün baş verib.
"Şəhidlərimizin - Cəbrayıl Dövlətzadənin, İzzət Həmidovun, Xudayarın və mənim evlənən oğlumun fotosunu qoyublar. Yəni ki, başqa yerdən də şəhid anaları təbrikə gəlib. “Şah Əmlak”ın yiyəsi Vüqar bəy onun altında rəy bildirib ki, "şəhid anaları zirvədədir. Amma bunlar özlərinə hörmət qoymayan qadınlardır. Gecə yatanda şükür edirlər ki, oğlanları şəhid olub. Xudayar bir mahnı oxudu, Radə xanım Bərdəni şuman etdi". Mən bundan sonra onun özü ilə əlaqə saxladım. Cavab verdi ki, "vaxtım yoxdu birazdan danışarıq”. Mən də dedim ki, “sənin mənimlə danışmağına ehtiyac yoxdur. Harada lazımdı, orada cavab verərsiniz”. Daha sonra mənə zəng edib işçilərinin bu rəyi yazdığını dedi. Biz də polis şöbəsinə verdik. Polis rəisi Ənvər müəllim, Allah ondan razı olsun operativ davrandı. Tək mən yox, Vəfa xanım Sumqayıtda, Məleykə xanım da Xətaidə şikayət ərizəsi veriblər. Amma Ənvər müəllim məsələyə ciddi yanaşdı. Yekə-yekə danışırdı ki, polis orqanına gələn deyiləm, filankəsin qohumuyam. Buna baxmayaraq, bizim qanunlarımız var. Başda Prezidentimiz və Vilayət müəllim (daxili işlər naziri Vilayət Eyvazov-red) olmaqla bütün polis əməkdaşlarımıza minnətdaram. Allah onlardan razı olsun".
Radə Qurbanova sözlərinə belə davam edib:
"Üzr istəməklə hamı canını qurtarırsa, həm onların təhqirini, həm dərdimizi götürüb çəkək? Sözü deyib üzr istəmək lazım deyil. Bu sözlərə görə üzrü kimsə qəbul edərdisə, mən də edim. O, bir nəfər ananı yox, üç nəfər ananı təhqir edir. Nə var ki, hər sözü deyib üzr istəsinlər. Yüzlərlə elə uşağı bağışlamışam, amma bunu bağışlamadım ki, yəni belə də olur. Mən heç kimə cəza verilməsini istəmirəm. Amma bilirsən nə istəyirəm? Çox gözəl millətimiz var, şəhidinə də, şəhid anasına da diqqət yetirir. İctimai qınaq olsun. Mənim oğlum döyüşəndə, sən hardaydın? Sən indi klaviatura arxasında oturub söz yazmaq asandır? Görək, nəyə şükür edirdik, niyə şükür edirdik. Səhərə kimi yatmırıq, şəhid analarının hamısı onkoloji xəstədir, qaraciyər xəstəsidir. Adamı mənəvi olaraq elə incidən sözlər var ki, onu bağışlamaq olmaz. Doğma balasına da adam bağışlamaz".
