REAL Partiyasının sədri ötən ilin sentyabrında dəyişib. Həmin vaxtdan İlqar Məmmədov partiyanın sədrliyindən gedib. Onu Natiq Cəfərli əvəz edib.
Maraqlıdır, yeni sədrdən sonra partiya daxilində hansı dəyişikliklər olub?
REAL Partiyasının sədri Natiq Cəfərli Modern.az-a bildirib ki, yeni strukturların yaradılması planlaşdırılır:
"Ötən ilin oktyabrdan fəaliyyətə başlamışam. Noyabrdan artıq bələdiyyə seçkiləri ilə bağlı prosesə start verildi. Əsas hədəfimiz bələdiyyə seçkiləri oldu. Bələdiyyə seçkiləri yekunlaşıb, rəsmi nəticələr isə hələlik açıqlanmayıb. Amma ilkin nəticələrə görə, 5 nəfər REAL üzvü müxtəlif bələdiyyələrdə - Gəncədə, Qaxda, Abşeron rayonun bəzi kəndlərində, İmişlidə bələdiyyə üzvü seçilib. Bu bizim üçün kifayət qədər yaxşı göstəricidir. 14 nəfər namizədlə seçkilərdə iştirak etmişdik. Partiya daxilində müxtəlif strukturların yaranması müzakirə olunur. Məşvərət Məclisi kimi bir qrup olacaq. Bələdiyyə seçkilərində qələbə qazanan şəxslər də orada iştirak edəcəklər".
N.Cəfərli partiyaya ayrılan maliyyə vəsaiti ilə bağlı bunları deyib:
"Hər rübün sonunda bilinir ki, nə qədər vəsait ayrılıb. Hələ ki ayrılan vəsait keçən ilin ilkin rübü ilə eynidir. Hər rüb maksimimum təqribən 10 min - 15 min artım olması gözlənilir. Dediyim kimi, hələlik dəqiq məlumat yoxdur. Ötən il partiyaya büdcədən ayrılan vəsait təqribən 290 min manata yaxın olub".
N.Cəfərli İlqar Məmmədovun partiyadakı rolundan da danışıb:
"REAL Partiyasının qərarvermə mexanizmi fərqlidir. REAL kollektiv kimlikdir və Siyasi Komitədə qərarlar alınır. Komitə iki həftədən bir toplaşır. Sədr isə həmin qərarların yerinə yetirilməsinə birbaşa rəhbərlik edir. Sədrin yeganə üstünlüyü odur ki, səsvermə zamanı səslər bərabər bölünürsə, sədrin sözü daha üstün sayılır, vəssalam. İlqar Məmmədov Siyasi Komitənin fəal üzvü kimi iştirak edir. Hər gün ofisdədir. Təşkilati və sənədləşmə məsələləri ilə məşğuldur. Yeni qanunvericiliyə görə, hər partiya yanvarın 15-nə qədər reyestrlə bağlı məlumatları yeniləməlidir. Bu qanunun doğru olduğunu düşünmürük, amma qanun qanundur. İlqar bəy o işlərlə məşğul idi".
Natiq Cəfərli partiyanı parlamentdə təmsil edən Erkin Qədirli ilə münasibətlərinə dair isə deyib:
"Kimlər deyirsə ki, Erkin Qədirli məni qəbul etmir, bu, yalandır. Biz elə dünən bir yerdəydik. Bizim münasibətlərimiz dostluqdan da artıqdır. Hər gün bir-birimizin evindəyik. Bütün günü bir yerdə olmuşuq".
