Son günlərdə həm Azərbaycanda, həm də Türkiyədə kiçik uşaqların iki ölkəyə olan sevgisini göstərən videolar tez-tez qarşımıza çıxır. Bu isə o deməkdir ki, gələcəyimiz etibarlı əllərdədir və iki ölkənin birgə gələcəyi daha da möhkəmlənəcək.

Ötən günlərdə sosial media hesabıma bir video göndərildi. Videoda kiçik bir uşağın səmimi sözləri səslənirdi və bu məndə dərin təsir bağışladı. O, Azərbaycanın Milli Qəhrəmanı Mübariz İbrahimovun igidliyindən danışırdı. Ancaq bu, təkcə bir qəhrəmanın hekayəsini anlatmaq deyildi – eyni zamanda, Azərbaycanın hər qarışına duyulan sevginin ifadəsi idi. O uşağın adı Tuqkan Alp Şenol idi. On yaşlı bir məktəbli olaraq, Azərbaycana olan bağlılığını və qəhrəmanlıq ruhunu hər cümləsində hiss etdirirdi.

Tuqkan Ankara şəhərindəki Şəhid Mahmud Uslu İbtidai Məktəbinin 4-cü sinif şagirdidir. O, babalarının qəhrəmanlıq dolu keçmişini qəlbində daşıyır və bu sevgini hər fürsətdə dilə gətirir. Videoda onun səmimi şəkildə dediyi "Mübariz İbrahimovu çox sevirəm! O, Azərbaycanın qəhrəmanıdır" sözləri təkcə bir uşağın sevgisini deyil, bütöv bir xalqın azadlıq mübarizəsinə olan ehtiramını əks etdirirdi.

Bu video mənə yalnız bir uşağın qəhrəmanlıq hekayələrinə olan marağını deyil, həm də keçmişin izlərindən necə ilham aldığını göstərdi. Tuqkanın babalarının qəhrəmanlıq hekayələri onun qəlbində dərin izlər buraxıb və o, bu şanlı keçmişi yaşadaraq gələcəyə daşımağa qərarlıdır. O, təkcə qəhrəmanları anmaqla kifayətlənmir, həm də öz ailəsinin tarixini yaşadaraq Azərbaycana olan sevgisini hər kəsə çatdırır.

Tuqkanın ulu babası Ömər 1918-ci ildə Azərbaycanın erməni silahlılarından azad olunmasında iştirak edib, 1920-ci ildə rus işğalı zamanı əsir düşmüş, lakin əsarətdən qaçaraq yenidən azadlığına qovuşub. Tuqkan bu qəhrəmanlıq tarixini dinləyərkən yalnız keçmişin igidlərini tanımır, həm də onların yolunu davam etdirmək istəyir. Digər babası Hakverdi Satılmış isə 1991-ci ildə Ermənistanın Azərbaycana təcavüzü zamanı Türkiyədən gələn könüllü döyüşçülər sırasına qoşulub. O, məşhur "Rüzgar Timi"nin tərkibində Tovuz döyüşlərində iştirak edərək Azərbaycanın haqq savaşına dəstək verib.

Tuqkan babalarının mirasına sahib çıxaraq, Azərbaycana olan sevgisini hər fürsətdə dilə gətirir. Bir uşağın gözündən baxanda belə görünür ki, bu sevgi və qəhrəmanlıq ruhu o qədər güclüdür ki, bütün dünyaya yayılacaq qədər əhəmiyyət daşıyır. Onun söylədiyi hər kəlmədə Azərbaycana olan sevgi və igidlik anlayışı ön plana çıxır. Və bu sevgi, zaman keçdikcə daha da güclənəcək, onu babalarının yolunu davam etdirməyə ruhlandıracaq.

Bu video təkcə bir uşağın qəhrəmanlıq sevgisini deyil, həm də bir xalqın azadlıq uğrunda apardığı mübarizənin simvolunu özündə əks etdirirdi. Tuqkan, babalarının izindən gedərək, gələcəkdə bu qəhrəmanlıq tarixini daha da möhkəmləndirəcək və Azərbaycana olan sevgisini bütün dünyaya çatdıracaq.

Türkiyə və Azərbaycan insanları arasında bu sevgi doğuşdan başlayır. Biz sadəcə dost deyilik, biz qardaşıq! Bu sevgi bizim gələcəyimizə işıq tutacaq və iki ölkə arasındakı bağları daim möhkəmləndirəcək.

 

Nigar Ögeday