Azərbaycanda dəmiryolu keçidlərindən istifadənin pozulmasına görə yeni cərimələr müəyyənləşir. Bununla bağlı İnzibati Xətalar Məcəlləsinə dəyişiklik edilməsi təklif olunur.

Sənəd Milli Məclisin Hüquq siyasəti və dövlət quruculuğu komitəsinin bugünkü iclasında müzakirə edilib.

Dəyişikliyə əsasən, dəmiryol keçidlərindən keçmə qaydalarının pozulmasına və ya nəqliyyat vasitələrinin dəmir yollarını dəmiryol keçidlərindən kənar yerlərdən keçməsinə görə 200 manat məbləğində cərimə tətbiq ediləcək.

Təklifə əsasən, xətaya görə inzibati tənbeh almış şəxs tərəfindən inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsinə görə nəqliyyat vasitəsini idarə etmək hüququ üç aydan altı ayadək müddətə məhdudlaşdırılacaq.

Həmçinin, xəta nəticəsində zərər çəkmiş şəxsin sağlamlığına yüngül bədən xəsarətinin yetirilməsinə görə 300 manat məbləğində cərimə tətbiq ediləcək və ya nəqliyyat vasitəsini idarə etmək hüququ 6 aydan 1 ilədək müddətə məhdudlaşdırılacaq.

Məcəlləyə əlavə edilən daha bir dəyişikliyə görə isə piyadalar tərəfindən dəmir yolunun piyadaların keçməsi üçün müəyyən edilmiş yerlərdən kənar keçilməsinə görə 40 manat məbləğində cərimə tətbiq ediləcək.

Bununla bərabər, mal-qaranı və at arabasını (kirşəni) sutkanın qaranlıq vaxtı və ya məhdud görünmə şəraitində dəmir yollarından, yolların bu məqsəd üçün xüsusi olaraq ayrılmayan yerlərindən keçirilməsinə görə cərimələr 40 manadan 80 manata qaldırılır.

Yeni cərimələrlə bağlı Modern.az-a danışan Milli Məclisin deputatı Arzuxan Əlizadə bildirib ki, insanların özündə qanunlara riayət etmək mədəniyyəti formalaşmalıdır:

"Təəssüflər olsun ki, bir çox halarda fərqli yanaşma görürük. Dəmir yollarında yolu piyadalar üçün nəzərdə tutulan keçiddən kənardan keçmək, qanunları pozanların özü üçün həyatı təhlükə yaradır. Qadağalara baxmayaraq buna davam edirlər. Biz dəfələrlə görürük ki, qatar yolunu keçən ya şəxs, ya avtomobil olsun düzgün olmayan yerdən keçid edirlərsə, böyük faicəyəyə də səbəb ola bilir".

A.Əlizadə cərimələrin artırılmasının yaxşı hal olmadığını, amma alternativ yolun qalmadığını vurğulayıb:

"Başqa alternativ qalmır. Bir çox məsələlərdə-avtomobildən zibil atılmasına görə və ya zibil qutusundan kənar yerlərə zibil atmağa görə cərimələrin artırılması cəmiyyətdə birmənalı qarşılanmır. Digər tərəfdən də artıq başqa alternativ yol qalmır deyə cərimələrin artırılmasına qərar verilir. Bu arzuolunan hal deyil. Amma cərimələrin artırılması ilə həmin insanların müəyyən qədər məsuliyyətli olmağa vadar etmək olur. Qərarın doğru-düzgün olduğunu hesab edirəm. Əslində, nəticə olaraq, insanlsrın sağlamlığına yönəlmiş bir addımdı. Bu baxımdan alternativ yol yoxdur. Maarifləndirici vasitələrdən istifadə edilməsi nəticə vermirsə, cərimələrin artırılması və ya əlavə tədbirlər görülməklə məsələnin qarşısını almaq olar".