Ölkədə müşahidə olunan qarlı hava şəraiti ictimai nəqliyyatda ciddi çətinliklər yaradıb. Bakıda bir sıra avtobusların yolları keçə bilmədiyi, bəzi marşrut xətlərində gecikmələrin və ləğvlərin olduğu müşahidə edilib.
Xüsusilə hündür ərazilərə qalxan avtobusların yolda qalması sərnişinlər üçün problemlər yaradıb. Nəqliyyat mütəxəssisləri bu vəziyyətin əsas səbəblərindən birinin avtobusların qış təkərləri ilə təchiz olunmaması olduğunu bildirirlər.
Hazırda bir çox avtobuslarda standart yay təkərlərinin istifadəsi təhlükəsizlik baxımından suallar doğurur. Qarlı və buzlu hava şəraitində yol tutuşu zəifləyir, bu da sərnişinlər üçün risk yaradır. Ekspertlər qış aylarında avtobusların xüsusi təkərlərlə təmin olunmasının vacibliyini vurğulayır və aidiyyəti qurumlardan bu məsələyə diqqət yetirilməsini tələb edirlər.
Mütəxəssislər bildirirlər ki, avtobusların yalnız qış təkərləri ilə deyil, ümumilikdə texniki baxımdan da qış mövsümünə uyğun hazırlanması vacibdir. Xüsusilə mühərriklərin antifrizlə təmin edilməsi, əyləc sistemlərinin yoxlanılması və yanacaq filtrlərinin təmizlənməsi kimi prosedurlar avtobusların təhlükəsiz hərəkəti üçün önəmlidir.
Modern.az qarlı hava şəraiti ilə bağlı ölkənin nəqliyyat şirkətləri olan “Bakubus” MMC və “Xaliq Faqoğlu” MMC ilə əlaqə saxlayıb.
“Bakubus” MMC-dən bildirilib ki, qarlı və şaxtalı hava şəraitində “Bakubus” avtobuslarının fasiləsiz və təhlükəsiz fəaliyyətini təmin etmək məqsədilə bir sıra əlavə texniki tədbirlər həyata keçirilir:
“Belə ki, avtobuslarin hərəkəti üçün gözlənilən əlverişsiz hava şəraitindən əvvəl bütün avtobuslar təkrar texniki baxışdan keçirilir. Təkərlərin vəziyyəti, əyləc sistemi və digər vacib mexanizmlər yoxlanılır. Avtobusların təhlükəsiz hərəkəti üçün lazımi qabaqlayıcı tədbirlər görülür. Sürücülərə xüsusi təlimatlar verilir. Sərnişin sıxlığını azaltmaq və gözləmə müddətini minimuma endirmək üçün zərurət olduqda ehtiyat avtobuslar xəttə buraxılır. Hava şəraiti və yollardakı vəziyyət monitorinq mərkəzitərəfindən operativ izlənilir və hərəkət qrafikində zərurət yaranarsa, dəyişikliklər edilir. Sərnişinlər bununla bağlı vaxtında məlumatlandırılır.
Şaxtalı və qarlı hava şəraitində sərnişinlərimizdən avtobus dayanacaqlarında ehtiyatlı olmalarını və təhlükəsizliyə diqqət yetirmələrini xahiş edirik”.
"Xalid Faiqoğlu" MMC-dən verilən məlumata görə, şirkət qış mövsümünə daha əvvəldən – sentyabr-oktyabr aylarından hazırlaşıb:
“Hazırda istismarımızda olan marşrut xətləri üzrə əvvəlcədən təyin edilmiş bütün nəqliyyat vasitələri sərnişinlərə xidmət göstərir. Təəssüf ki, yolların buz bağlaması, bəzi ərazilərdə çətin yol şəraitinin olması müşahidə edilir, bu da işimizi müəyyən qədər çətinləşdirir.
Avtobuslarda texniki işlərə gəlincə, bununla bağlı olaraq ilk olaraq bütün avtobuslarımızın istilik və havalandırma sistemləri daha əvvəldən yoxlanılıb və saz vəziyyətə gətirilib. Çünki nəqliyyat vasitəsinin salonunda isitmə və havalandırma ilə bağlı problem olarsa sürücünün onu idarəetməsi çox çətinləşir və mümkünsüz olur. Bununla yanaşı bütün nəqliyyat vasitələrimizdə keyfiyyətli antifrizlərdən istifadə edilir. Antifiriz mənfi temperatur şəraitində daxiliyanma mühərriklərini, yanğına qarşı boru kəmərlərini soyutmaq, pəncərə və nəzarət şüşələrinin donması və tərləməsinin qarşısını almaq üçün işlədilən çətindonan mayedir və bunun sayəsində nəqliyyat vasitələrimizdə hər hansı donma halı yoxdur. Həmçinin nəqliyyat vasitələrinin şinləri də daim nəzarətdə saxlanılır”.
