Xəbər verildiyi kimi, Azərbaycanın səhiyyə tarixində ilk dəfə meyitdən orqan köçürülməsi əməliyyatları həyata keçirilib. Orqan transplantasiyası Mərkəzi Gömrük Hospitalında və Milli Oftalmologiya Mərkəzində gerçəkləşib.
Fevralın 24-də həyata keçirilən orqan köçürmə əməliyyatı üç xəstə üzərində aparılıb.
Belə ki, meyitdən götürülmüş qaraciyər Mərkəzi Gömrük Hospitalında qaraciyər sirrozundan əziyyət çəkən 2002-ci il təvəllüdlü Şərifova Mənzər Yaşar qızına uğurla köçürülüb.
Gözün buynuz qişası isə Akademik Zərifə Əliyeva adına Milli Oftalmologiya Mərkəzində Zaqatala və Füzulidən olan iki nəfərə köçürülüb.
Orqan Donorluğu və Transplantasiyası üzrə Koordinasiya Mərkəzindən Modern.az-a verilən məlumata görə, Azərbaycanda 100 nəfərə yaxın vətəndaş vəfat edəndən sonra orqanlarını bağışlamaq istədiklərini bildirib. Onlar rəsmi qeydiyyata alınıblar.
