Keçmiş müdafiə naziri Rəhim Qazıyev Müsavat Partiyasının başqanı, parlamentinin sabiq sədri İsa Qəmbərin vaxtilə Bakıda erməni deputatlarla gizli danışıqlar apardığını iddia edib.

Onun sözlərinə görə, guya İsa Qəmbər bir qrup erməni deputatın Azərbaycan və Ermənistan arasındakı münaqişəni dinc yolla nizamlamaq məqsədli yazılı müraciətini parlament üzvləri və xalqdan gizlədib.

R.Qazıyevin iddiasına görə, bu müraciət sonralar İ.Qəmbərin arxivindən çıxarılaraq ona ötürülüb. 

Sabiq baş nazir Pənah Hüseyn də məsələyə münasibət bildirib. O, Rəhim Qazıyevin yalan danışdığını deyib. P.Hüseyn Ermənistanın keçmiş prezidenti Levon Ter-Petrosyanın dövründə parlamentin deputatı olan Aşot Bleyan və onun gətirdiyi müraciətlə bağlı sübutlar da dərc edib:

“5 noyabr 1992-ci ildə, Bleyan Bakıda olduğu vaxtda parlamentin spikeri İsa Qəmbər iclasda çıxış edərək,  sözügedən məsələ və sənəd haqqında deputatlara məlumat verib. Səhəri gün müvafiq məlumat rəsmi dövlət qəzeti olan “Azərbaycan”da dərc edilib. Yəni bütün ölkə ictimaiyyəti bir qrup erməni deputatın müraciəti ilə tanış olub. Bleyan elə Bakıdaykən həmin sənəddə imzası olduğu deyilən Ermənistan parlament üzvlərinin bundan imtina etdikləri barədə İrəvanda açıqlama yaydı. Həmin açıqlama Ermənistan mediasında dərc edilərək Bakıya da çatdı”.

Modern.az məsələ ilə bağlı Musavat Partiyasının da mövqeyini öyrənib.

Partiya sədrinin müavini Gülağa Aslanlı deyib ki, bu məsələdə Pənah Hüseynin paylaşımına baxmaq kifayət edir:

“Orada aydın görmək olur ki, həmin hadisə ilə bağlı İsa bəy parlamentdə məlumat verib. Həmin məsələyə parlamentin münasibəti də var”.  

G.Aslanlı Rəhim Qazıyev və Qurban Məmmədovun tək Müsavat partiyasına və İsa Qəmbərə yox, ümumilikdə Azərbaycana qarşı olduğunu söyləyib:

“Hansısa yolla gündəmdə qalmaq üçün Rəhim Qazıyev, Qurban Məmmədov kimi adamların niyyətini tutmaq lazımdır. Onların niyyəti tək Müsavat Partiyasına, İsa Qəmbərə qarşı olmaq deyil, onlar həm də bütövlükdə Azərbaycana qarşıdırlar. Hər ikisi indiki halda bütövlükdə Azərbaycana qarşıdırlar. Onlar Azərbyacanın o vaxtkı parlamentinə də qarşıdırlar”.

O deyib ki, Rəhim Qazıyev özünün Rusiya agenti olduğu sübut olunduğu halda yenə də özünə haqq qazandırmaq üçün digərlərinə şər-böhtan atmaqla məşğuldur:

"Müsavat Partiyasını, İsa Qəmbəri ləkələmək heç də ona baş ucalığı gətirməz. Müsavat Partiyası ciddi adam olmadığı üçün onun  sözlərini müzakirə predmetinə çevirmək istəmir".