Azərbaycanda ötən ilin sonlarından başlayaraq hərbi çağırış sistemində ciddi islahalatlar həyata keçirilib. Hərbi xidmətə çağırış yaşının 35-dən 30-a endirilməsi, təhsil alan gənclərin hərbi xidmətə çağırışı ilə bağlı yenilikliklər bu islahatların tərkib hissəsidir. Bəzi ekspertlər və deputatlar islahatların davam edəcəyini düşünür.
Milli Məclisin deputatı Aydın Mirzəzadə Modern.az-a açıqlamasında bildirib ki, hərbi xidmətə çağırış yaşının 35 yaşdan 30-a endirilməsi ordumuzun şəxsi heyətlə təminatına heç bir təsir etmir:
“Statistika göstərir ki, çağırışçılarımız gənc yaşında hərbi xidmətdən keçib vətən borcunu ödəməyə üstünlük verirlər. 30 yaşdan sonra çox cüzi sayda hərbi qulluqçumuz var idi. Zaman keçdikcə müddətdən artıq xidmət edənlərin və ümumiyyətlə peşəkar orduya keçilməsi məsələsinə baxıla bilər. Amma bu gün hələki çağırışla formalaşan ordu sistemi çox vacibdir".
Deputat qeyd edib ki, Ermənistanla sülh müqaviləsi bağlanmayıb, ölkəmizə xaricdən müəyyən dairələr hətta ölkələr tərəfindən təhdidlər var.
"Bunun qarşısını almaq üçün hər kəsin hərbi xidmət keçməsi olduqca vacibdir. Hərbi xidmət keçmə Azərbaycan gənclər arasında şərəf məsələsidir. Bu gün ordudan yayınmaq gənclərə demək olar ki, rast gəlinmir. Sülh müqaviləsi bağlanandan, ölkəmizə qarşı təhdidlər azalandan sonra ordu formalaşmasının digər dövlətlərdə olan nümunələrini nəzərdən keçirmək olar. Əsas məsələ dövlətimizin təhlükəsizliyini təmin etmək, ərazi bütövlüyümüzün toxunulmaz olduğunu anti-Azərbaycan qüvvələrə birmənalı şəkildə çatdırmaqdır", - Aydın Mirzəzadə vurğulayıb.
