Azərbaycanın 7 şəhərində yerləşən çoxmənzilli binalarda yeni lift quraşdırılacaq. Fevralın 28-də Prezident İlham Əliyev bu barədə sərəncam imzalayıb. Bu məqsədlə 9 milyon 940 min manat ayrılıb.
Bakıda 141, Sumqayıtda 30, Naxçıvanda 11, Gəncədə 10, Xırdalanda 5, Qazaxda 2, Bərdə 1 ədəd lift quraşdırılacaq.
Qeyd edək ki, Bakıda bir çox binada lift problemi var. Yeni sərəncamın hansı binalara şamil ediləcəyi hələlik məlum deyil.
Mövzu ilə bağlı Modern.az-ın sorğusuna cavab olaraq Bakı Şəhər “Lifttəmir” İstehsalat Birliyi tərəfindən bildirilib ki, son bir neçə ildə alman istehsalı olan 1206 ədəd yeni müasir lift Bakıya gətirilərək quraşdırılıb.
“Alınan liftlərə xidmət göstərilməsi və onları daimi nəzarətdə saxlanılması üçün “Lifttəmir” İstehsalat Birliyində Mərkəzi Dispetçer Xidməti Sistemi qurulub. Məlumat üçün bildirək ki, “Lifttəmir” İstehsalat Birliyinin balansında olan istismar vaxtı keçmiş, 25 ildən artıq işləyən liftlər qrafikə uyğun olaraq dəyişdirilir. alınacaq 141 ədəd lift də paytaxtın müxtəlif rayinlarında istismar müddəti bitən liftlərin yerinə quraşdırılacaq”.
