Bir neçə gün əvvəl Milli Məclisin deputatı, tanınmış jurnalist Elçin Mirzəbəyli fikirləri müzakirələrə səbəb olan kinorejissor Ayaz Salayevi müdafiə edən məqalə dərc edib.
Modern.az-ın məlumatına görə, Elçin Mirzəbəyli sosial şəbəkə istifadəçiləri tərəfindən “top atəşinə tutulan” Ayaz Salayevin "insan öz taleyini yaşadığı ölkənin taleyindən ayırmamalıdır" sözlərini sitat gətirib.
"Bir müddət öncə qohum dil və ləhcələrin, xüsusilə də daha çox daşıyıcısı olan dillərin bir-birinə təsir göstərdiyi barədə nəzəriyyələri əsas gətirərək, fikirlərini özünəməxsus, uğurlu hesab etmədiyim bir şəkildə, daxili senzuradan keçirmədən ifadə edən Ayaz Salayevə gəldikdə isə, fikirlərimi mövzuya uyğun və çox qısa ifadə edəcəyəm. Populist ritorika ədalətli və real yanaşmanın qənimidir. Ayaz Salayevlərin sayı azaldıqca Balaəlilərin sayı artacaq. Son 10 il ərzində toplumsal intellektual və mədəni səviyyəmizin haradan haraya endiyini nəzərə alsaq, bizi bir müddət sonra mənəvi deqradasiyanın dibinə enmək kimi bir təhlükə gözləyir", - o qeyd edib.
Vətəndaş Həmrəyliyi Partiyasının sədri, sabiq millət vəkili Sabir Rüstəmxanlı Elçin Mirzəbəylinin məqaləsinə münasibət bildirib.
O qeyd edib ki, Elçin Mirzəbəyli “populist ritorika ədalətli və real yanaşmanın qənimidir” cümləsi ilə öz seçimini edir, ona görə ana dili tərəfdarları “populist ritorika” ilə məşğuldurlar, Ayaz Salayev isə ədalətli və real yanaşmanın təmsilçisidir və bizlər onun qənimiyik.
"Bu yerdə hörmətli millət vəkilindən soruşuram: sən anadilli məktəblərin müdafiəsini hansı haqla, hansı məntiqlə, hansı vətəndaş yanaşması ilə “populist ritorika” hesab edirsən? “Ayaz Salayevlərin sayı azaldıqca Baləlilərin sayı artacaq”. Bu da Elçin bəyin sözüdür. Bu cümlədə hörmətli millət vəkili anadilli məktəblərimizi aşağıladığının fərqində deyil.
Ayaz Salayev istedadlı adamdır, dostumuzdur və ona olan kobud hücumları mən də pislədim. O cür düşünmək və danışmaq onun haqqıdır. Lakin bu mövqeyi “ölkənin taleyinə bağlılıq” və uşaqlarımızın seçə biləcəyi yol kimi təbliğ etmək yanlışdır", - Sabir Rüstəmxanlı deyib.
O qeyd edib ki, milli dəyərlərə qarşı olan heç bir söz ədalətli ola bilməz:
"Öz Konstitutsiya hüquqlarını, ana dilini qorumaq mövqeyini “populist ritorika” saymağın özü də azərbaycançı olmaq istəyi ilə daban-dabana ziddir. Mənim anadilli məktəbləri inkişaf etdirmək, qorumaq, uşaqlarımızı ana dilində oxutmaq haqqında dediklərimə bəziləri millətçilik damğası vurur. Bir daha təkrarlayıram, mən uşaqlarımızın xarici dilləri öyrənməsini alqışlayıram, lakin ana dilinin hesabına yox! Xalqların ana dili qorunmalıdır, düzdür. Lakin yüzillərlə ana dilinə ərəb, fars, rus, Avropa sözləri axanda susan xalqın qardaş xalqların dilindən gələn 10-15 kəlməyə qarşı cəbhə açması anormallıqdır və türk dövlətlərinin inteqrasiyasını istəməyənlərin yad təbliğatı altında formalaşmış türk düşmənçiliyi siyasətidir".
