Azərbaycanda kənd təsərrüfatında istifadə olunan heyvanların (at, eşşək) sayı azalıb.
2025-ci ilin əvvəlində ölkəmizdə 49442 baş at olub. Bu göstərici 2023-cü illə müqayisədə 3600 baş azdır. Yəni, bir ildə Azərbaycanda atların sayı təxminən 7 faiz azalıb.
Eşşəklərin sayında da azalma davam edir.2025-ci ilin əvvəlində 12709 baş eşşək olub. Bu göstərici ötən illə müqayisədə 2215 baş azdır. Ümumilikdə son illərdə Azərbaycanda eşşəklərin sayı sürətlə azalır. Belə ki, 2004-cü ildə ölkəmizdə 42.2 min, 2014-cü ildə 43.4 min baş eşşək olduğu halda 2024-cü ilin məlumatlarına görə bu rəqəm 14.9 min olub. Rəsmi qurumlar azalmanın səbəbini açıqlamayıb.
Modern.az mövzu ilə bağlı Milli Məclisin Aqrar siyasət komitəsinin sədri Tahir Rzayevlə həmsöhbət olub.
Onun sözlərinə görə, kənd təsərrüfatında istifadə olunan minik heyvanlarının sayının azalması təbiidir:
“Vaxtilə texnikanın, avadanlıqların çatışmadığı bir vaxtda belə heyvanlardan istifadə olunması zərurətə çevrilirdi. Sözsüz ki, bu da müəyyən qədər işlərin nizamlanmasına kömək edirdi. Ancaq artıq dövr dəyişir, ev heyvanları kənd təsərrüfatında daha az sayda istifadə olunur. Ona görə də onun saxlanılmasına, istifadə edilməsinə ehtiyac duyulmur və heyvanların sayı azalır”.
T.Rzayev bildirib ki, digər tərəfdən həmin heyvanların saxlanılması, yemlə təmin olunması xeyli çətindir:
“Onlara qulluq, baytar xidməti lazımdır. Ona görə də insanlar artıq ehtiyac hiss etmirlər. Bu gün müasir texnologiyalar,maşınlar, avadanlıqlar, mexanizmlər var. Onlar kənd təsərrüfatında insanların işinə daha yaxşı yarayır”.
