Almaniya Prezidenti Frank-Valter Ştaynmayer aprelin 1-də Azərbaycan Respublikasına rəsmi səfərə gəlib. O, Bakıda bir sıra görüşlər keçirəcək.
Modern.az xəbər verir ki, bu, onun prezident kimi ilk səfəridir, lakin Ştaynmayer Azərbaycana siyasətçi kimi ilk dəfə gəlmir.
O, Almaniyanın xarici işlər naziri vəzifəsində çalışdığı dövrlərdə dəfələrlə Azərbaycana səfər edib.
Frank-Valter Ştaynmayer iki müxtəlif dövrdə Almaniyanın xarici işlər naziri olaraq fəaliyyət göstərib. İlk dəfə 2005-2009-cu illərdə Angela Merkelin rəhbərlik etdiyi böyük koalisiya hökumətində, ikinci dəfə isə 2013-2017-ci illərdə yenidən Angela Merkelin rəhbərlik etdiyi hökumətdə bu vəzifəni icra edib. Həmçinin 2007-2009-cu illərdə vitse-kansler vəzifəsini də tutub.
Almaniyanın xarici işlər naziri kimi Frank-Valter Ştaynmayerin Azərbaycana ilk rəsmi səfəri 19 fevral 2007-ci ildə baş tutub. Bu səfər zamanı iki ölkə arasında enerji təhlükəsizliyi, iqtisadi əməkdaşlıq və Cənubi Qafqazdakı regional məsələlər müzakirə olunub. Ştaynmayerin Bakıdakı görüşləri zamanı Azərbaycan və Almaniya arasında münasibətlərin daha da inkişaf etdirilməsinin vacibliyi vurğulanıb.
Ştaynmayerin növbəti səfəri 2014-cü ildə olub. Oktyabr ayında baş tutan səfər zamanı əsas diqqət Azərbaycan və Almaniya arasında siyasi və iqtisadi əlaqələrin inkişaf etdirilməsinə yönəlib. O, həmçinin Qarabağ məsələsinin həlli istiqamətində Azərbaycan rəsmiləri ilə müzakirələr aparıb. Səfər zamanı Azərbaycanın Avropa İttifaqı ilə münasibətlərinə də xüsusi önəm verilib.
Ştaynmayerin xarici işlər naziri kimi Azərbaycana sonuncu səfəri 2016-cı ildə olub. O, həmin vaxt, həmçinin ATƏT-in fəaliyyətdə olan sədri idi. Səfərin əsas məqsədi Qarabağ məsələsinin həlli prosesinə dəstək vermək və tərəflər arasında dialoqu təşviq etmək idi. Həmçinin, enerji sahəsində əməkdaşlıq məsələləri də gündəmdə olub.
Onun budəfəki səfəri qalmaqalla yadda qalıb. Almaniya Prezidentinin sosial media profilində artıq keçmişin qalığı olan qondarma rejimin bayrağının yerləşdirilməsi və onun altında yazılan mətn Azərbaycan tərəfinin ciddi narazılığına səbəb olub.
Almaniya tərəfi bu postun səhvən yerləşdirildiyini etiraf edərək onu dərhal çıxarıb. "Belə bir səhvə yol verilməsinə görə çox məyusam. Paylaşımın Azərbaycanda bəzi insanlarda yaratdığı yanlış təəssürata görə səmimi-qəlbdən üzr istəyirəm", - Almaniya Prezident Administrasiyasının rəhbəri Dövlət katibi Dörte Dinger Prezidentin köməkçisi Hikmət Hacıyevə yazdığı məktubda belə deyib.
Həmçinin, Almaniya dövlət mediası "Deutsche Welle" Qarabağla bağlı erməni narrativlərini təkrarlayan sənədli film yayımlayıb. Azərbaycanın müxtəlif qurumları sənədli filmə etiraz bildirib.
