Sonuncu bələdiyyə seçkilərindən sonra Azərbaycandakı bələdiyyələrin sayı azalaraq 685-ə enib. Bu dəyişiklik bir çox sahələrdə bələdiyyələrin fəaliyyətinə müsbət təsir etməkdədir. Bununla belə bir sıra bələdiyyələrin açıqladığı hesabatlarda problemlər nəzərə çarpır. Bəs bu hesabatlar kimə və necə təqdim edilməlidir?
Modern.az mövzu ilə bağlı "Bələdiyyələrin fəaliyyətinin təbliği” ictimai birliyinin sədri Vüqar Tofiqli ilə həmsöhbət olub.
Onun sözlərinə görə, qanunvericiliyə əsasən, bələdiyyələr ildə 2 dəfə seçicilərinə hesabat verirlər:
“İllik yekun hesabatı isə yanvar ayında ictimailəşdirməlidirlər. Onlar seçicilərlə mütəmadi olaraq görüşlər keçirməli, öz iclaslarında müzakirələr aparmalı və yekun olaraq seçicilərə təqdim etməlidirlər. Seçici bilməlidir ki, bələdiyyə il ərzində hansı işi görüb, hansı problemlərlə üz-üzə qalıb, vergilərin yığılması hansı səviyyədədir, seçicinin özü bələdiyyəyə hansı dəstəyi göstərib. Ona görə də güman edirəm ki, Azərbaycan bələdiyyəsi birləşdirmədən sonra aktiv şəkildə bu prosesin icrasını təmin etmiş olacaq. Çünki əvvəlki bələdiyyələrin bir çoxu gəlirsiz və fəaliyyətsiz idi. Nəticə etibarilə faəliyyətsiz olduğuna görə də onların müəyyən qisminin əməkhaqqı borcları var və işlək mexanizmləri yox idi”.
“Güman edirəm ki, birləşdirmədən sonra müəyyən aktivlik yaranacaq və bələdiyyələr də hesabatlarını həm sosial media vasitəsilə, həm də qanunda göstərildiyi kimi, inzibati binalarında təqdim edəcəklər.
Bələdiyyələr sosial media platformalarından aktiv iştirak etsələr, bələdiyyə-secici münasibətləri də sivil şəkildə öz həllini tapmiş olur. Muşahidələr göstərir ki, bu gün yeni seçilmiş bələdiyyə sədrləri və üzvlərinin müəyyən bir qismi sosial media platformalarından daha aktiv şəkildə istifadə edir.
Onlar sosial medianın verdiyi bütun imkanlardan yararlanmağa çalışırlar. Bu istiqamətdə bir çox bələdiyyələr çox aktivdir.
Ümumilikdə götürdükdə isə hesabatın təqdim olunmasını hələ tam qənaətbəxş saymaq olmaz. Ona görə ki, müəyyən problemlər hələ öz həllini tapmayıb. Xüsusilə də maliyyə məsələləri ilə bağlı problemlər var. Güman edirəm ki, maliyyə məsələləri öz həllini tapsa, büdcə gəlirləri artsa, bələdiyyələrin daha aktiv şəkildə seçicilərinə hesabat vermək imkanı yaranacaq. Bu gün müəyyən bələdiyyələr var ki, həqiqətən aktivdirlər. Məsələn, bu sıraya Xətai, Nərimanov, Binəqədi, Nəsimi, Səbail, Rəsulzadə, Nizami, Şüvəlan bələdiyyələrini aid edə bilərik. Bir çox bələdiyyələr var ki, büdcə gəlirlərində artım olduğuna görə həm seçicilərinə vaxtında hesabat verir, həm də həyata keçirdikləri layihələrin həcmi də yüksəkdir. Güman edirəm ki, birləşdirmədən sonra bələdiyyələr hesabatlılıq məsələsinə daha ciddi şəkildə diqqətdə saxlayacaqlar”-V.Tofiqli qeyd edib.
