Dövlət Təhlükəsizliyi Xidmətinin keçirdiyi əməliyyat nəticəsində həbs olunan, mobil telefonlara və digər texniki avadanlıqlara kənardan nüfuz edən proqramlar yaratmaqda, kompüter məlumatlarını qanunsuz ələ keçirməkdə təqsirləndirilən, “Zeromap” MMC-in icraçı direktoru Tural Əliyevin cinayət işi üzrə növbəti məhkəmə prosesi keçirilib.
Modern.az APA-ya istinadən xəbər verir ki, Yasamal Rayon Məhkəməsində hakim Rəşad Cavadzadənin sədrliyi ilə keçirilən prosesdə şahidlər ifadə verib.
Təqsirləndirilən şəxsin içraçı direktoru olduğu “Zeromap” MMC-in təsisçisi, “İdrak” şirkətinin prezidenti Hikmət Abdullayev şahid qismində ifadə verib.
Şahid ifadəsində qeyd edib ki, Turalla onu 2021-ci ildə ortaq tanışları görüşdürüb:
“Mən onunla söhbət etdikdən sonra sahə üzrə bilikli olduğunu gördüm. Onu işə götürdüm və özünü göstərməyi tapşırdım. Eyni zamanda, ona iş görməsi üçün bütün lazımi şəraitin yaradılacağını, texniki dəstəyin göstəriləcəyini bildirdim. Bununla yanaşı, ona dünyanın heç bir ölkəsinin şirkətlərinin gizlin şəkildə məxfi məlumatlarına daxil olmamasını tapşırmışdım”.
Şahid bildirib ki, Tural Əliyevə tətbiqlərdə boşluqları qısa zamanda aşkar edən proqram yaradılması üçün tapşırıq verib:
“Həmin proqramı biz dövlət orqanlarına təqdim edəcəkdik. Onlar bəyənsəydilər, tətbiq edəcəkdik”.
Hikmət Abdullayev qeyd edib ki, bir müddət sonra xaricdən ölkədən qayıdan zaman onu hava limanında DTX əməkdaşları qarşılayıb və o, istintaqa dəvət olunub. O, Turalın saxlanıldığını, saxlanma əsasının onun şirkətlərin server sisteminə qanunsuz daxil olması olduğunu bilib.
Məlum olub ki, 2021-2024-cü illər ərzində Hikmət Abdullayevin rəhbəri olduğu “İdrak” şirkəti Tural Əliyevin “Zeromap” şirkətinə 80 min manat ödəniş edib.
Şahid bildirib ki, bu iş və müddət qarşılığında 80 min böyük məbləğ deyil: “Şirkət hər zaman risk etməyi bacarmalıdır. 80 min şirkət üçün böyük məbləğ deyil. Biz pul yatırmalıyıq ki, daha çox qazanaq. Mənim pul qarşılığında tələbim boşluqları aşkar edən proqram tapmaq idi. Tələbim ziyanverici proqram yaratmaq deyildi.”.
Məlum olub ki, təqsirləndirilən şəxs həmçinin 2024-cü ilin aprel ayında “Ultra Texniki” MMC-nin serverinə qanunsuz şəkildə müdaxilə edib.
Daha sonra iş üzrə şahid qismində tanınan E.Abdullayev ifadə verib:
“İkimiz də eyni sahə üzrə fəaliyyət göstəririk. Forumların birində tanış olmuşuq. Tural ziyanverici proqamlar yaratmağa, onlarla maraqlanmağa meyilli idi. Hətta kiberhücumlara cəhd də edib. Hansı şirkətə cəhd etdiyini xatırlamıram. Lakin həmin cəhdlər uğursuzluqla nəticələnmişdi”.
Təqsirləndirilən şəxs Tural Əliyev məhkəmədə bildirib ki, o, iş üzrə özünü qismən təqsirli bilir:
“Mən “Ultra Texniki” MMC-nin serverinə qanunsuz şəkildə müdaxiləyə cəhddə özümü təqsirli bilirəm, amma ittiham aktında qeyd olunan “Ulduz” MMC şirkəti barəsində olan hissədə ittihamı qəbul etmirəm”.
Proses aprelin 17-də davam etdiriləcək.
Qeyd edək ki, Tural Əliyev Dövlət Təhlükəsizliyi Xidmətinin keçirdiyi əməliyyat nəticəsində saxlanılıb. Təqsirləndirilən şəxsə Cinayət Məcəlləsinin 271.2.1 (kompüter sisteminə qanunsuz daxil olma), 272.2.1 (kompüter məlumatlarını qanunsuz ələ keçirmə) və 273-1.1-ci (kibercinayətlərin törədilməsi üçün hazırlanmış vasitələrin dövriyyəsi) maddələri ilə ittiham irəli sürülüb.
İttihamda deyilir ki, təqsirləndirilən şəxs 4 il ərzində yerli və xarici fiziki və hüquqi şəxslərin mobil telefonlarına və kompüter sistemlərinə müdaxilə edib, mesajlarını oxuyub.
Bundan əlavə, Tural kiberhücumlar nəticəsində xarici şirkətlərinin hamıya açıq olmayan məlumatlarına da giriş əldə edib.
