Azərbaycan qanunvericiliyində 6 və daha çox uşağı olan ailələr çoxuşaqlı ailə hesab olunur. Bir müddət əvvəl parlamentdə çoxuşaqlı ailə anlayışının dəyişdirilməsi təklif edilib. Belə ki, 3-dən çox uşağı olan ailələrin çoxuşaqlı ailə hesab edilməsi təklif olunur.

Ötən gün deputat Razi Nurullayev bildirib ki, artıq Əmək və Əhalinin Sosial Müdafiə Nazirliyi ilə ümumi razılığa gəlinib və qısa müddətdən sonra üçuşaqlı ailələrə “uşaq pulunun” verilməsinə başlanılacaq. 

O qeyd edib ki, prosesin bu il və ya gələn ildən başlayacağı gözlənilir.

"Üçuşaqlı ailələrə “uşaq pulu”nun verilməsi həm Milli Məclisin Əmək və sosial siyasət komitəsi səviyyəsində, həm də Sahil Babayevin əmək və əhalinin sosial müdafiəsi naziri olduğu müddətdə müzakirə edilib. Hazırkı yeni nazirlə də bu sahədə müzakirələr gedir”, - deputat bildirib.

Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondundan Modern.az-ın sorğusuna cavab olaraq bildirilib ki, hazırda ölkəmizdə sosial müavinət alan çoxuşaqlı ailələrin sayı 70 000-ə yaxındır.

"Onlardan 5-dən çox uşağı olan hər uşağa görə müavinət alan qadınların sayı 2 800-dən çoxdur. Eyni zamanda yaşa görə müavinət alan valideynlərini itirmiş və ya valideyn himayəsindən məhrum olmuş 8 yaşınadək övladlığa və ya qəyyumluğa götürülmüş uşaqlar da daxil olmaqla beş və daha çox uşağı olan ailələrin sayı 4 300-dən çox, üç və daha çox uşaq doğub 8 yaşınadək tərbiyə etmiş 57 yaşına çatmış qadınların sayı isə 62 000-dən çoxdur", - qurumdan verilən məlumatda deyilir.