Bazarda kartof və soğanın qiymətində kəskin artım müşahidə edilir. Xüsusilə də, kartofun qiyməti "əl yandırır".

Belə ki, 1 manat 50 qəpikdən başlayan qiymətlər 3 manata qədər yüksəlir.

Kartofun və soğanın qiymətində kəskin artımın səbəbi və bahalaşmanın nə qədər davam edəcəyi sual doğrurur.

Modern.az-a açıqlamasında iqtisadçı ekspert Akif Nəsirli bildirib ki, ölkəmizdə kartofun bahalaşması yerli istehsal olunan kartof ehtiyatlarının tükənməsi ilə bağlıdır:

"Hazırda təxminən ölkə daxilində tələbatın 80%-i həcmində kartof istehsal edirik. Faraş kartofu, adətən, yaz aylarında ixrac edirik. Yayın sonu, payızın əvvəlində isə faraş kartof həm bazara çıxarılır, həm də ehtiyat olaraq anbarlara yığılır. Deməli, kartof-soğanın hər il fevral-mart aylarında bahalaşması müşahidə olunur. Bunun da səbəbi həmin aylarda ehtiyatın tükənməsidir. Soğanın tükənməsini dekabr-yanvar aylarında ixracatın intensivləşməsi ilə bağlayırıq. Həmin dövrdə dünya bazarında soğanın qiyməti artır və fermerlər öz soğanlarını baha satmaq üçün ixraca önəm verirlər. Buna müəyyən məhdudiyyətlər qoyulub, amma məhdudiyyətlər bütün aylara aid olduğuna görə səmərə vermir. Məhdudiyyətlər konkret dekabr-yanvar, fevral aylarına qoyulmalıdır".

A.Nəsirli vurğulayıb ki, yaxın vaxtlarda kartof ucuzlaşacaq:

"Uzağı bir həftəyə faraş kartofu bazarda görəcəyik. Bununla da kartofun qiyməti yavaş-yavaş aşağı düşməyə başlayacaq. İndi kartofun qiymətinin daha çox artması, ixracatçı sahibkarların idxala ehtiyatla yanaşmlarından qaynaqlanır. Onlar böyük partiyalarla kartof gətirib ziyana düşmək istəmirlər. Sahibkarlar kiçik partiyalarla kartof gətirirlər, beləliklə də, tələb təklifi üstələyir, ona görə də qiymətlər artır. Yaxın günlərdə kartofun qiymətinin düşməsini müşahidə edəcəyik".