Bu həftə IV Antalya Diplomatik Forumu öz işinə başlayır. 11-13 aprel tarixlərində keçiriləcək forumda dünyanın bir çox ölkələrindən dövlət başçıları, diplomatlar, nazirlər, ekspertlər iştirak edəcəklər.
Modern.az-ın məlumatına görə, Forumun saytında dəvət edilən şəxslərin siyahısı dərc edilib.
Siyahıya görə, Forumda Azərbaycan Prezidenti İlham Əliyev və birinci xanım Mehriban Əliyeva da iştirak edəcək.
Həmçinin, Prezidentin köməkçisi – Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev, Prezidentin xüsusi tapşırıqlar üzrə nümayəndəsi Elçin Əmirbəyov, xarici işlər naziri Ceyhun Bayramov, Prezidentin iqlim məsələləri üzrə nümayəndəsi Muxtar Babayev, Dövlət Statistika Komitəsinin sədri Tahir Budaqov, xarici işlər nazirinin müavini, COP29-un baş danışıqçısı Yalçın Rəfiyev, müdafiə naziri Zakir Həsənov, Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov, Milli Məclisin Səhiyyə komitəsinin sədri Əhliman Əmraslanov, deputatlar Əziz Ələkbərli, Nigar Arpadarai, Ramil Həsənin də adı siyahıya daxil edilib.
Digər Cənubi Qafqaz ölkələrindən - Gürcüstan və Ermənistandan da Forumda iştirak edənlər olacaq.
Gürcüstandan Forumda Baş nazir İrakli Kobaxidze, xarici işlər naziri Maka Botçoroşvili iştirak edəcəklər. Ermənistandan isə xarici işlər naziri Ararat Mirzoyan, Ermənistan parlamentinin vitse-spikeri Ruben Rubinyan Foruma qatılacaq.
Saytımıza açıqlamasında Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov bildirib ki, Antalya Diplomatik Forumu getdikcə öz sanbalını, əhəmiyyətini və təsirini genişləndirir:
"Bütün dünyadan siyasətçilər Antalya Forumuna gəlir, bütün məsələləri müzakirə edirlər. Biz parlament diplomatiyası ilə məşğul olan insanlarıq. Ona görə də belə beynəlxalq tədbirdən kənarda qalmaq düzgün deyil. Azərbaycan həmişə bütün beynəlxalq forumlarda aktiv iştirak edib. Konkret olan məsələlərin hamısı ilə bağlı hər şeyi sizə təqdim etmək fikrində deyiləm. Parlamentin bir neçə deputatı orada iştirak edəcək. Bizim başqa strukturlardan da nümayəndələrimiz Foruma qatılacaqlar. Azərbaycanla, regionla, eləcə də dünyada gedən proseslərlə bağlı Azərbaycan təbii ki, öz mövqeyini açıq şəkildə təqdim edəcək".
Komitə sədri Gürcüstan və Ermənistan nümayəndə heyətləri ilə görüşüb görüşməyəcəkləri ilə bağlı sualımıza isə belə cavab verib:
"Bizim ümumi məqsədimiz bir balaca fərqlidir. Təbii Ermənistandan da, Gürcüstandan da Foruma gəlirlər. Antaliya Diplomatik Forumu dünya diplomatiyasının ən öndə gedən forumlarından birinə, bəlkə də, birincisinə çevrilib. Təhlükəsizlik üzrə Münhen Forumu çox əhəmiyyətli olduğu kimi, diplomatiya üzrə Antalyada keçiriləcək forum önəmlidir. Həmin Forumda bizim iştirakımız vacibdir".
