Qida Təhlükəsizliyi Agentliyinin (AQTA) son vaxtlar keçirdiyi yoxlamalar nəticəsində bir çox qurumda saxta, tərkibində insan sağlamlığı üçün təhlükəli sayıla biləcək maddələr olan "kərə yağları" aşkarlanıb. Bu kimi hallara son qoyulması üçün daha nələr edilməlidir? 

İqtisadçı ekspert Natiq Cəfərli Modern.az-a bildirib ki, belə hallarla mübarizə aparmaq üçün dövlətin kifayət qədər qurumları var:

“Buraya istehlakçıların hüquqlarını müdafiə edən qurumlardan tutmuş ərzaq məhsullarının vəziyyətini yoxlayan çoxsaylı təşkilatlar daxildir. Bu yoxlamaların aparılması onların məsuliyyətidir, onlar yoxlamalar aparmalıdırlar. Amma ölkədə minlərlə pərakəndə satış məntəqəsinin olduğunu nəzərə alsaq, bu nəzarəti həyata keçirmək demək olar ki, mümkün deyil. Burada vətəndaş nəzarətinə və dövlətin vətəndaşla əməkdaşlıq etməsinə ehtiyac var”.

“Vətəndaşlar özləri ən yaxşı nəzarətçidirlər. Düzgün mexanizm və sistem qurulsa, vətəndaş və dövlət qurumları arasında bağ yaransa, mənə elə gəlir ki, bu sahədə irəliləyiş ola bilər. Dövlətin ən azı 10 milyonluq potensial nəzarətçi ordusu var. Bu o deməkdir ki, istehlakçılar haqlı şikayət və iradlarını tez çatıdırıb tez də cavab almalıdırlar. Hətta onlara dəyən ziyanın kompensasiyasını almaq mexanizmi qurulmalıdır. Bu zaman dövlət orqanlarına da ehtiyac qalmayacaq. Vətəndaşın özü ciddi nəzarət institutuna çevriləcək”, - N.Cəfərli qeyd edib.