Şimali Kipr Türk Respublikasının Baş naziri Ünal Üstel Azərbaycan Prezidenti İlham Əliyevə təşəkkür edib.

Modern.az-ın məlumatına görə, o, Azərbaycanın Şimali Kiprə dəstəyinin həyati əhəmiyyət daşıdığını bildirib:

“Can Azərbaycan Prezidenti cənab İlham Əliyevin sözləri bizləri çox sevindirmişdir.

Türkiyə ilə birlikdə apardığımız mübarizədə Can Azərbaycanın Şimali Kipr Türk Respublikasının beynəlxalq aləmdə haqq etdiyi yeri alması üçün göstərdiyi dəstək həyati əhəmiyyət daşıyır.

Biz hər zaman açıq şəkildə ifadə edirik: biz bir millət, üç dövlətik.

Bu şüurla mübarizəmizi qətiyyətlə davam etdiririk.

Hər sahədə bizim yanımızda olan cənab Əliyevə və Azərbaycan xalqına öz adımdan və xalqım adından təşəkkürümü bildirirəm”. 

Qeyd edək ki, Prezident İlham Əliyev Bakıda bu gün keçirilən konfrans zamanı Şimali Kipr məsələsinə toxunub. Prezident deyib ki, Azərbaycan Şimali Kipr Türk Respublikasının Türk Dövlətləri Təşkilatında müşahidəçi statusu almasında fəal rol oynayıb.

"Biz bu məsələni fəal şəkildə müdafiə edən ölkələrdənik. Prezident Tatar təşkilatın Şuşa şəhərində qeyri-rəsmi Zirvə toplantısına dəvət olundu və orada iştirak etdi. Şimali Kiprin bayrağı da orada dalğalanırdı", - dövlət başçısı qeyd edib.

Prezident əlavə edib ki, Azərbaycanın siyasəti hər zaman aydın olub: “Biz hər zaman qardaşlarımızın yanındayıq. Bizim siyasətimiz hər zaman aydın olub. Bizim bu sahədə hər hansı başqa gündəliyimiz yoxdur. Biz yalnız qardaşlarımıza necə kömək edə biləcəyimiz haqda düşünürük ki, onlar öz dövlətlərini qoruyub saxlaya bilsinlər. Onlar buna tarix və əməlləri baxımından layiqdirlər".

Vaxtilə BMT-nin Baş katibi tərəfindən referendum elan edilən zaman Türkiyə Kiprinin birləşməyə, yunan Kiprinin nümayəndələrinin isə bunun əleyhinə səs verdiklərini xatırladan Prezident qeyd edib: “Baxın, nə baş verdi? Yunan Kipri Avropa İttifaqına üzv qəbul olundu. Bu ədalətlidirmi? Yəni, bu, ikili standartın bariz nümunəsi idi və siyasətçilər bu haqda danışmaq istəmirlər. Yəni, onlar başlarını ağrıtmaq istəmirlər və bu haqda danışsalar, onlara başağrıdan başqa da problemlər yarana bilər. Ona görə də Şimali Kiprdəki qardaşlarımızı əmin etmək istəyirəm, biz hər zaman sizinlə olacağıq ki, ölkəniz müstəqil dövlət kimi təsis edilsin və beynəlxalq ictimaiyyət tərəfindən tanınsın”.